Lawal Daura: Seiyefa go replace di former DSS oga wey Osinbajo sack
Matthew Seiyefa go resume work on Wednesday as di new oga of Department of State Security (DSS), wey be Nigeria secret police.
Acting Presido Yemi Osinbajo on Tuesday sack Lawal Daura di former Director Genral sake of why im men go block National Assembly gate.
- Our hand no follow for wetin dey happun for National Assembly - APC
- President Buhari dey go London go chill for 10 days
Acting Presido tok say di kolobi of di National Assembly na bad tin for di kontri constitution, rule and order.
Seiyefa wey from Bayelsa state southern Nigeria, go take replace oga Daura as acting Director General.
Di new oga of DSS na di second most senior oga before, but as Mr Daura don chop sack.
Di tok-tok pesin for oga Osinbajo, Laolu Akande, na im cari dis informate put for Twitter.
Akande tok say, ''Daura go hand over to di most senior officer of di State Security Service until further notice.''
Im still tok say dis illegal tin wey dem do, wey di presido no join, dem condemn.
Dis na serious u-turn afta di DSS and Police block di National Assembly gate for Tuesday morning.
Lawmakers wey turn up for one Senate meeting no see chance enta on top dis blockade.
But lawmakers of di ruling All Progressives Congress don wash dia hand comot from wetin di DSS do, even as di opposition Peoples Democratic Party don cari accuse nack dem.