EFCC question Zenith Bank MD, say Rivers State goment N117bn withdrawal no pure

To fight corruption na one of di big agenda on top Nigeria President Muhammadu Buhari table. Image copyright EFCC
Image example To fight corruption na one of di big agenda on top Nigeria President Muhammadu Buhari table.

We update dis tori on May 28, 2019.

Nigeria corruption police, EFCC, don question di Managing Director of Zenith Bank, Peter Amangbo, according to local reports.

EFCC ask di Zenith Bank Group Managing Director questions on top di way Rivers State take withdraw 117 billion Naira from goment money for di last three years.

Financial Intelligence law wey concern money mata for Nigeria be say banks must report give EFCC wen pesin or organization, including goment bodi wan withdraw or transfer big money from banks.

Image copyright Zenith Bank
Image example Zenith Bank MD, Peter Amangbo

Di Economic and Financial Crimes Commission (EFCC) tok say di way Rivers State take withdraw dis money for di last 3 years no too pure.

But e be like say Rivers State Govnor, Nyesom Ezenwo Wike, go wear di same trouser wit EFCC as dem wan chook eye inside di mata and begin investigate everi-everi.

Rivers State goment don tell EFCC to leave di state alone so dat dem go fit focus and give dia pipo di better tins of democracy.

Image copyright Twitter/@Gov_Wike
Image example Govnor Nyesom Wike

Special assistant to di govenor ontop Electronic Media, Simeon Nwakaudu, quote wetin di governor tok inside one statement.

E tok say "We no dey fear EFCC probe and dem no get power to probe us"

"No goment official go appear in front of EFCC until dem go court of appeal to cancel di 2017 judgement wey stop dem not to investigate di state."

For one statement wey dem release on August 28, 2018, Zenith Bank tok say di EFCC invite dia GMD make him come explain how dem dey operate di Rivers State government account wey dey wit dem.

Topics Wey Dem Resemble

Another thing we de for inside dis tori