Kemi Adeosun waka leave Nigeria afta she resign?

Aworan Kemi adeosun Image copyright @HMKemiAdeosun
Image example Adeọṣun pada sọrọ lori ẹsun ayederu iwe ẹri isinruulu NYSC ti wọn fi kan

Former Nigeria Minister of Finance, Kemi Adeosun, fit don run comot di kontri, one day afta she drop her resign letter over forgery mata, local tori pipo Premium Times dey report.

Madam Adeosun resign Friday as she find out say di National Youth Service Corps (NYSC) certificate wey she use qualify to become Finance Minister na fake.

Many don call say make authorities gbab Adeosun and charge her to court for forgery of her NYSC exemption certificate, even though inside letter wey she write give President Muhammadu Buhari, di ex-minister say she sef shock say di certificate na fake.

PDP National publicity secretary Kola Ologbondiyan tok inside one tori paper say di opposition party wan to torchlight dis madam on top accuse say oil money miss road wey lead to high fuel price; small moni inside Nigeria foreign reserves, tiff tiff of moni wey Switzerland return and other big corner corner waka wey no pure inside di ministry.

Di opposition party tok for di paper say Nigeria Presido Muhammadu Buhari for cover her up if no be di way pipo dey hala since July 2018 wen tori land say she forge her NYSC certificate.

To forge any document na serious offence for Nigeria law wey fit carri up to 14 years for jail.

51-year-old Adeosun don already say she be UK citizen, say na even afta she reach 34 years, she begin live for her Nigeria - di kontri of her parents, so nothing go dey wrong if to say, she return go back 'home'.

Image copyright Getty Images
Image example For 2011, Kemi Adeosun even use dis same certificate become Finance Commissioner for Ogun State south west Nigeria, according to Premium Times

President Muhammadu Buhari on Friday accept di resign letter of Minister of Finance, Kemi Adeosun and approve anoda minister Zainab Ahmed to dey in charge of finance ministry.

Dis dey come more dan two months afta one Nigerian tori pipo first comot di allegation of fake certificate on 7 July, wia dem suggest say even National Assembly know about di mata but decide to close eye.

Kemi Adeosun say she shock say her NYSC certificate na fake

Inside her resign letter on 14 September, di immediate former minister of finance say she sef shock when she find out say di NYSC exemption certificate wey she don dey carri up and down, na fake.

Adeosun say dis na because dis na di same NYSC certificate wey she take work for Ogun State House of Assembly in 2011 and also use am in 2015 for Directorate of State Services (DSS) clearance. Even National Assembly sef screen am and no see di certificate get comma.

Nigerian investigation tori pipo Premium Times go see dis as victory because dia allegation against di minister end up to be true - if to say na lie dem lie ontop Adeosun head, na dem for dey inside hot soup as she fit decide to carri dem go court.

E dey important to point out say in all di seven paragraph wey Adeosun write inside di resign letter, she no mention Premium Times, or di alleged padi-padi with di National Assembly.

Image copyright @HMKemiAdeosun
Image example Kemi Adeosun become Nigeria Minister of Finace for November 2015 wit dis same certificate, according to Premium Times

Anoda pipo wey go see dis as victory na those wey don dey call for Oga Buhari to stand by im tok of 'zero corruption' and sack Adeosun. Dis sack no eventually happun and Adeosun use di opportunity to thank Buhari for im "patience".

"Your Excellency... make I commend your patience and support, during dis long search for di truth in dis mata," tok Adeosun for her letter.

Now wey di position of permanent Minister of Finance dey open, some Nigerians wey don accuse Oga Buhari of nepotism - wen im appoint Yusuf Bichi wey be northerner as DSS Oga - go dey look to see who di president go nominate for di job.

Another thing we de for inside dis tori