Amnesty International say video of headless Cameroon officer na real

Soldier wey hold gun. Image copyright Getty Images

Rights group Amnesty International don confirm say video wey show di head of one Cameroonian security officer wey separatists behead dey real.

Amnesty International say di video and "di killi-killi of ordinary pipo and security forces" na proof of "di rise of terrible fight-fight" for di English-speaking region of Cameroon.

Dem don kill hundreds of pipo and di fight-fight don pursue more dan 200,000 comot from dia house since late 2016.

Dis video na di latest one from all di plenti videos wey dey spread about di serious fight-fight for Cameroon. Sabi pipo for Amnesty explain say di security officer get wound for head wey dem put inside cloth wey blood full, come keep am near wetin fit be im manhood region. One pesin wey dey inside di video say im be one of di members of di separatist group, "Ambazonia Liberation Forces".

Amnesty believe say na for North-West Cameroon dem shoot di video but dem say dem neva fit confirm di exact area.

All di help wey charity agencies don try give kontri men don turn struggle to find di areas wia di fight-fight dey happen. Dem no even dey gree tori pipo enta di area.

Presidential elections go hold next month wey President Paul Biya go contest for im seventh term for office.

Topics Wey Dem Resemble

Another thing we de for inside dis tori