MTN and four banks dey cooperate wit Nigeria Central Bank afta e sama dem $8.1 billion fine

MTN Image copyright Getty Images

Central Bank for Nigeria (CBN) say e dey torchlight informate wey e collect for di hand of MTN and four banks wey e accuse say dem helep di South African phone company use mago mago cari $8.1 billion go obodo oyibo.

CBN say wit dis fresh informate wey dem dey chook eye on top, e dey for di back of dia mind to reach deal wey go agree wit evribodi.

Na for last month Central Bank give order make MTN and di four banks return di $8.1 billion wey dem claim say dem ship go obodo oyibo return back to Nigeria unto say e no follow law.

CBN also nack di banks fine;

  • Standard Chartered PLC gbab N2.4 billion ($7.86 million)
  • Stanbic IBTC Bank PLC cari N1.8 billion naira
  • Citibank chop N1.2 billion naira
  • Diamond Bank PLC see red wit N250 million naira
Image copyright AFP/Getty Images
Image example MTN don face plenti wahala for di last 17 years since dem begin operate for Nigeria.

MTN don deny dis accuse wey dey hang for dia neck and dem say togeda wit di banks dem bin dey relate tey tey wit CBN on top di mata.

For email CBN tell tori pipo say, "On top di recent regulation mata, di banks and MTN dey work wit CBN and dem don give us additional informate wey we dey torchlight wit mind to reach deal wey go gree wit evribodi''.

CBN still tok say e go kontinu to open door wella to foreign investment and dat dis sanction wey e hama di banks no be plan to block investor moni.

MTN don face plenti wahala for di last 17 years since dem begin operate for Nigeria.

In 2015, Nigeria goment fine dem $5.2 billion unto say dem no cut di lines dem of unregistered SIM cards from dia network. Goment later reduce di fine to $1.7 billion

MTN na di biggest mobile phone company for Nigeria, dia customers reach around 50 million pipo.

Topics Wey Dem Resemble

Another thing we de for inside dis tori