Minimum wage: Pipo wey go enjoy di new 30k wen e become law

Trader Image copyright PIUS UTOMI EKPEI
Image example Market pipo fit increase dia price

Nigeria Presido Muhammadu Buhari on Tuesday gree make workers for di kontri begin collect N30,000 as Minimum wage.

Buhari tok say e go send bill give di National Assembly on top di mata to make am law.

Vice President of one of di labour unions, Nigeria Labour Congress wey be Comrade Solomon Adelegan tell BBC News Pidgin say if goment gree di new minimum wage, plenti pipo dey wey go enjoy am.

Workers

Image copyright Getty Images

Oga Adelegan say pipo wey dey work for both public and private organisations go dey collect di new wage. Im add say di increment go affect workers for all levels, no be just for entry level workers.

Goment

Image copyright Getty Images

Di minimum wage wey labour dey ginger go also benefit goment sake of say di tax wey dem go dey collect from workers go increase because di more pesin salary, di more dia tax.

Dem go fit use dis tax do all dia work.

Traders

Image copyright Getty Images
Image example Business go dey boom if workers dey collect more salary

Those wey no dey do office work fit dey feel say dis increase for minimum wage no consign dem but Comrade Adelegan say dem too go benefit.

If workers dey collect more salary, dem go see more money to buy tins for market. Dis one mean say business go dey move for traders.

Comrade Adelegan say di increase for minimum wage go even make di kontri Gross Domestic Product (GDP) increase and dat one mean say tins go beta for di kontri.

Im add say di labour union still dey fight states wey dey owe dia workers salary and those wey no dey even pay reach di current minimum wage.

Topics Wey Dem Resemble

Another thing we de for inside dis tori