Minimum wage fresh demand of 66.5k na rumour, but if goment no gree 30k by November 6 labour go shut down Nigeria - NLC
Nigeria Labour Congress tell BBC Pidgin on Wednesday say come November 6, dem go do di kain strike wey go shut down di kontri if di kontri goment no gree di N30,000 wey dem dey ask for.
Solomon Adelegan di Vice presido of NLC say di labour union no know anytin about di rumour wey dey fly upanda say na N66,500 dem want now.
Comrade Adelegan say NLC own be say di N24,000 wey di federal goment dey propose no go work.
- No road transport, electricity, health service - Labour unions warn goment
- Why minimum wage palava neva finish for Nigeria
Di NLC oga explain say dat N30,000 wey dem gree sef na say make peace reign because di way dem look am be say na everage of 30 days dey inside one month so a family of four go spend N1,000 a day.
"Dis minimum wage na matter of law wey na evri five five years we suppose dey review am... Wetin we dey tok na suppose don happun for 2016. Na im be say for two years, wey don do jeje with federal goment," tok Adelegan.
Dis dey come afta Nigeria govnors do meeting finish, come comot to say na N22,500 dem ready to pay as minimum wage to workers all over di kontri, even though tori be say one govnor at least, don gree to di N30, 000 - Benue State govnor Samuel Ortom.
When we ask Adelegan whether NLC go boycott 2019 general elections if federal goment no gree dia condition, e reply "on day one, we go enta boardroom to decide wetin to do, but for now our plan na to shut down di kontri on November 6".
Wia dis mata don dey from come
Governors for Nigeria afta dia emergency meeting for Abuja, Nigeria's capital on Tuesday announce say dem no go fit pay di N30,000 wey labour and trade unions dey demand.
Dem say di only moni wey dem go fit pay workers na N22,500, wey be N4,500 increase on top di N18,000 wey workers dey collect.
Labour and Nigeria goment don dey negotiate tey tey on top how to increase workers salary. Labour dey demand N50,000 before dem reduce am.
Nigerian Labour Congress President, Ayuba Wabba, don tok say di decision of di govnors dey against wetin dem tok for committee.
E say e beta make di govnors go back to dia state and and discuss wetin dem fit pay.
Dem don warn goment say if dem no implement dia demand, dem go go strike for 6 November.
Na dis one come put fire for goment bum-bum to see how dem go stop di strike wey fit happun.
Dis na why do governor sef Kia Kia hold dia emergency meeting and both di ministers of Labour and Productivity, Chris Ngige and dat of National Planning, senator Udoma Udoma.
Abdulaziz Yari, Chairman of Nigeria Governors Forum and di governor of Zamfara state, say dem don agree say total personnel cost no suppose pass 50% of di moni wey state get for pocket.