Nigeria missing general burial no go hold again on Friday
Burial for General Idris Alkali, di Nigeria missing army general wey soldiers find im deadi bodi for well inside Plateau no go happun on Friday again, according to wetin Family tell BBC News Pidgin.
Di family bin say dem go bury di general on Friday afta Jumat prayer for National Mosque, Abuja.
Oga Alkali wey be Nigeria Airmy Chief of Administration, retire few weeks before dem declare say e dey miss on Monday, September 3, 2018, a day afta gunmen kill about 13 pesins for Dura-Du District, Jos, Plateau state, north central Nigeria.
Now dem say dem don post pone am till further notice.
Mohammed Abubakar Kuru wey be cousin of di general say im death na great shock and dat since e loss, dia hope bin dey up say may be dem go find am alive.
E explain give say member of di family dey feel plenty pain but as Muslims, dem thank God say dem even find am to give beta burial.
Army see deadi bodi of Nigeria missing General on Wednessday
Nigerian Army finally see di dead body of Idris Alkali di missing General, wey loss since September.
Di Garrison Commander of Division 3 of Nigerian Army, Brig. Gen. Umar Mohammed, say dem find im dead body for well for Guchwet, Jos South Local Government Area of Plateau State, north central Nigeria.
Na Wednesday around 7am Nigerian army find di bodi of di retired Army General Idris Alkali.
Garrison Commander 3 Division Nigerian Army, Brigadier General, Umar Mohammed tell tori pipo say na one of di suspects wey submit imsef give police afta dem declare am wanted naim carry army go di abandoned well.
Nigerian army issue order to find di retired Army General dead or alive wen tori come out say e dey miss for September 2018 and all those wey follow do di crime go face di law.