Ganduje: 'I neva in my life collect bribe from anybody before'

Ganduje: Kano State Assembly summon di govnor appear on Friday

Wia dis foto come from, Ganduje Hallacci

Kano state Govnor Abdulahi Ganduje no show face on Friday before committee of lawmakers wey dey investigate am one video wey dey show wia im dey collect dollar.

Di governor send im commissioner of information Muhammad Garba to represent am wit letter wey oga Ganduje write.

Di commissioner wey read di letter for floor of di assembly yan say Ganduje neva for im life colet bribe from anybody and no go ever colet for future.

"Dis allegation na just to spoil my name, I have neva in my life collect bribe from anybody before. Dis kain bad thing happen to former Governor Ibrahim Shekarau and recently Emir of Kano."

Di state Attorney General Ibrahim Mukhtar wey follow come yan say di Committee dey try well well as dem wan give all parties fair hearing and dem deserve hailing.

Wetin we call dis foto,

Muhammad Garba

Tori be say di committee wey Kano State House of Assembly set up to investigate di videos ask di governor to come tok im side.

Meanwhile number four video don comot wey dey show wia Govnor Ganduje dey collect dollar.

Wetin we call dis foto,

Chairman of di committee Baffa Dan Agundi and di committee members on Friday

Inside letter wey dem send go goment house on 31st October wey BBC News Pidgin see, dem also tell Ganduje say im fit come with im lawyers.

As tins be so, oga Ganduje fit no show face on November 2, according to wetin pesin wey sabi how tins dey for goment house Kano tell BBC News Pidgin.

Wetin we call dis foto,

Kano House of Assembly dey do investigate ontop di video wey show wia govnor Ganduje dey collect dollar

Tori be say anoda video begin dey circulate on October 31 wey be like di first two show Abdullahi Ganduje, di govnor of Kano State for northwest Nigeria dey colet money from somebodi.

Wen di first video land October 14 Nigeria corruption police EFCC tell BBC afta 24 hours say dem neva see video wia Govnor Ganduje dey 'collect' dollars, by di time di second video wit voice land days later, police even stop youths not to protest on top di mata.

Na only di Assembly men go fit impeach di govnor to face any warrant on top all di #gandujegate videos wey dey fly upandan since October 2018.

Na just last week one of most respected imams for Kano Sheik Ibrahim Daurawa use im Friday sermon to tell Kano Assembly say make dem do their job well.

Daurawa yan say if di governor dey guilty then make dem take di necessary action on am.

Dis issue remain di most discussed for Nigeria's most populated state for now.