Offa robbery suspect wey die show say my hand dey clean - Saraki
Nigeria Senate President Bukola Saraki want make goment chook eye inside 'how and wen' Michael Adikwu, di main suspect inside di Offa bank robbery wey kill pass 30 pipo for Kwara, south-west of di kontri take die.
Kwara State Attorney General and Commissioner for Justice Kamaldeen Ajibade tell Ilorin High Court on Wednesday say Adikwu die for police custody. Im tok dis one give Justice Halimat Salman wen dem cari di five oda suspects ontop di case go court.
Di Offa bank robbery case bin take anoda level wen police accuse number three man for Nigeria, oga of di Senate Bukola Saraki, say im get hand inside. Im bin deny di accuse.
- Na former policeman lead robbers wey kill 17 pipo for Kwara State - Police
- Offa robbers wey kill 33 pipo attend Saraki pikin wedding - Police
Micheal Adikwu di suspect wey die, na from Benue State and na former police officer wey dem bin dismiss from di force.
For inside statement, Saraki Special Adviser ontop Media and Publicity Yusuph Olaniyonu say di new informate from police make sense wit wetin im first tok say dem don kill di suspect and mago-mago dey di case to implicate am.
"If una fit remember say we don first tok am say dem don murder di main suspect and dem just dey target me and odas wit di case."
"Wit tori wey dey ground now, wetin di investigation suppose find out na wen di suspect die? How im take die? Why police bin dey deny am? Wen oga of police find out and why police dey cover up?" Na wetin Saraki tok be dat
'Na court mata'
Tok-tok pesin for Nigeria Police Jimoh Moshood say di force no go fit open mouth tok about how di main suspect inside di Offa bank robbery take die for dia custody.
Wen BBC Yoruba call police to find out how di suspect take die for dia hand, oga Moshood wey be dia tok tok pesin say: "Di case dey court and I no go fit tok put."
Na like 30 pipo die on 5 April 2018, inside di robbery attack wey happun for Offa area of Kwara State.