Akwa Ibom: "If di state burn today, na Nigeria Police Force cause am" - Govnor Udom Emmanuel

Govnor Udom Emmanuel Image copyright @OfficialPDPNig
Image example Nigeria police neva yan anytin inside di mata.

Akwa Ibom State Govnor Udom Emmanuel reveal on Tuesday say im get info since Monday night say di state Assembly go boil again.

Tori be say five opposition lawmakers do sitting and try to suspend 21 odas Tuesday afternoon, di mata make di state govnor Emmanuel burst enta di Assembly to settle di kwanta.

"Na since last night I hear say dis kain plan go happun. Police even release di pipo wey carri fake army uniforms wit 18 AK 47 guns enta di Assembly." Di govnor address tori pipo as soon as di kwanta happun.

Image copyright @MrUdomEmmanuel
Image example Govnor Udom Emmanuel

"Today na di police use by force escort di lawmakers wey court don sack enta enta Akwa Ibom State House of Assembly to do sitting. We want di whole world to know say if Akwa Ibom burn today, na Nigeria Police Force cause am" di govnor wey be chief security officer tok.

Oga Emmanuel say wetin dey happun for di Assembly na dis same 'war saw war' threat na im dey cause am and "we don report give police and oga president but no bodi don take step to address di mata, so dem dey leave Akwa Ibom pipo to defend demsefs"

Di govnor draw warning say di new state Police Commissioner must leave di state by Tuesday evening, because "police don gbab Akwa Ibom state to allow bad tins to dey happun."

Nigeria police neva yan anytin inside di mata.

Akwa Ibom state tanda for di oil rich southern Nigeria and na di opposition PDP dey control am.

"E start wen di five impeached lawmakers enta di assembly dey hold mock sitting for wia dem raise motion to suspend di remaining 21 lawmakers come block di lawmakers make dem no hold dia actual sitting", according to tori pesin for Uyo tell BBC News Pidgin.

Na dia jaguda beating follow, wey make di impeached lawmaker wey bin dey act as speaker to jump fence run.

Now di 21 lawmakers for dia sitting don vote to comot dia Commissioner of Police who dem suspect help di five impeached lawmakers enta di Chambers hold sitting and also don raise motion to arrest di law makers wey dem impeach.

Image copyright EiENigeria

Nigeria main opposition party presidential candidate Atiku Abubakar say wetin happun today for di Akwa Ibom State House of Assembly no dey good for democracy.

Dis na wetin Nigeria main opposition party, Peoples' Democratic Party tok about di mata.

However Udofia tok say tok wey dey enta social media say di five lawmakers bin dey try impeach Govnor Udom Emmanuel na rumour.

Image copyright Twitter/@daily_trust

Di before before Senate Minority Leader Godswill Akpabio wey hand over to Govnor Emmanuel Udom don waka enta Nigeria ruling party APC and since then na power struggle dey ground ontop who go control politics for inside di state before di 2019 election.

Dem no support media player for your device
I no be Amaechi boy, I go inherit im friends, win over im enemies -Tonye Cole

Topics Wey Dem Resemble

Another thing we de for inside dis tori