Justice Onnoghen case adjourn as Nigeria Chief Justice no show face for CCT

Di defence team
Image example Justice Onnoghen dfence team

Di Court of Conduct Tribunal for Abuja, Nigeria don adjourn to January 22 to hear di case before dem against di Chief Justice of Nigeria Walter Onnoghen wey dey face trial ontop case of non-asset declaration.

BBC tori pipo wey monitor how di mata go for di courtroom headquarter for Jabi Daki biyu, Saloman Lar way confam say di legal team of Onnoghen show to defend di Justice, di Justice imsef, Onnoghen no show for court.

Di CCT bin schedule Monday, January 14 as di day to start di trial against Onnoghen afta di Code of Conduct Bureau file six count charge of non asset declaration against Justice Onnoghen.

Ogbonge Lawyers dem full court to defend di CJN. On Sunday, Senior Advocate of Nigeria Olisa Agbakoba tell BBC Pidgin say im go prepare case to defend am.

Many pipo don chook mouth for di matter including di South-South governors wey say make Onnoghen bone di trial.

Di lawyer wey lead Onnoghen defense team Senior Advocate of Nigeria, Wole Olanipekun say di CCT no get power to prosecute Justice Walter Onnoghen.

Olanipekun for floor of of the court say di timing for di case too dey near and dat e dey shocking say just last week wen di issue happun, dem don rush to hear di mata say make dem shift di case go January 28.

According to Olanipekun, Onnoghen imsef no come court because dem no serve am im paper sef.

Image example Some lawyers do I no go gree for front of di court say goment no follow due process ontop di CJN case

Meanwhile, Director of Public Prosecution for Kano State, Aliyu Umar (SAN) wey represent goment for di mata, say dem serve di CJN personal assistant di paper, but di defendant lawyer come argue say for criminal mata of dat nature, e dey improper to serve im personal assistant.

Di goment lawyer, come apply for adjournment to make sure say dem serve di Chief Justice di case mata in person say make di case continue for Friday dis week but Olanipekun say na 28 go be di beta time.Afta much argument, di court come adjourn to January 22 to hear di mata.

See some oda foto dem from inside and outside di CCT courtroom for Abuja as di trial start.

Topics Wey Dem Resemble

Another thing we de for inside dis tori