Tambuwal win for Sokoto plus oda results from di supplementary govnorship elections

Aminu Tambuwal Image copyright Tambuwal/Facebook
Image example Tambuwal wey port from APC to PDP don win di 2019 govnorship elections according to INEC

Di Independent Electoral Commission don declare Aminu Tambuwal as di winner of di Sokoto state govnorship election.

Di current Governor of di state win wit 512,002 votes from di two elections combine: di first one on 9 March and di 23 March supplementary elections.

Ahmad Aliyu of the All Progressives Congress (APC) almost reach Tambuwal wit 511,661.

So na wit just 342 votes Tambuwal - wey bin dey APC before but port go PDP - take gap Aliyu.

Dis na di updates wey know from oda states as at di time we do dis tori

Plateau

Earlier dis morning, INEC announce say incumbent Govnor of Plateau State, Simon Bako Lalong of di All Progressives Congress (APC) don win di 2019 govnorship election, afta im win wit 595, 582 votes to defeat Senator Jeremiah Useni of di Peoples Democratic Party (PDP), wey get 546, 813 votes.

Di election for Plateau bin dey peaceful.

Bauchi

Di Peoples Democratic Party govnorship candidate Bala Mohammed dey lead wit 6376 votes for di result of di re-run election wey happun on Saturday.

Im closest rival and di current govnor of di state Mohammed Abubakar of di All Progressive Congress (APC) dey im back wit 5117 votes.

But di returning officer for di state Prof Kyari Mohammed say im no get power to declare di winner yet because result from Tafawa Balewa local goment area neva ready.

Kano

Chairmo of PDP, di main opposition party for Kano Rabiu Bichi, don already ask INEC to cancel di rerun elections dia sake of political thuggery wey dem say affect free and fair voting everywhere.

BBC also take our eye see say voting no happun for di ten polling units wey we visit because of wetin resemble voter intimidation.

Image example Dis one happun for Dala LGA

But APC Secretary for di state Ibrahim Sarina tok say wetin PDP tok no enta because for where im dey for Takai LGA, voting dey happun without any issue. "I dey Takai LGA and everything dey move smoothly, forget everything wey opposition dey tok."

Benue

Di Independent National Electoral Commission don declare di govnorship candidate of di Peoples Democratic Party Samuel Ortom winner of di Benue state govnorship election wit.

Prof Maimako Sebastian, Returning officer of Benue state na im declare am winner.

Ortom wey be di current govnor of di state win im closest rival Emmanuel Jime from APC wit 434473 votes, a combination of votes from both di govnorship election from March 9 plus di supplementary election of March 23.

Im closest rival from di ruling All Progressives Congress, Emmanuel Jime score 345155 votes.

Another thing we de for inside dis tori