Rivers State Governorship Election 2019 Result: Police stop Rivers protest afta Govnor Nyesom Wike put ban

pipo gats do hans up tp go work

Police say dem use small force take pursue two political parties we yenta road protest election mata on Friday morning for Port Harcourt.

Tori be say Rivers State government last night ban all forms public protests until further notice.

Police tell BBC Pidgin say as dem notice say jaguda pipo fit hijack di protest ontop di suspended govnorship and house of assembly election, dem decide purse di pipo wey gada for polo club.

"My pipo (police men) say dem tok to di protesters and dem leave peacefully, and e possible say dem use tear gas for those wey no gree listen," Nnamdi Omoni, di Police tok-tok pesin for Rivers State command tok.

E say 'protest na pipo right' but na say 'make dem no no abuse di right.'

"We just get di report say Rivers State gomenet place ontop protest, but I no fit comment on top di ban and I believe say di Police Commissioner go discuss dis ban at strategic level wit di Govnor (Nyesom Wike)"

Di state spokesperson, Emma Okah announce di goment decision on Thursday, say all security agencies don collect directive to enforce di order.

Meanwhile, main opposition PDP dey para say jaguda pipo wan cause confusion for Rivers State wia dem believe say na di party dey win di Govnorship election.

Nigeria election offic INEC bin suspend di 9 March election for Rivers State sake of wetin dem say be violence and gbege dem wey happun as di election happun.

Since wey INEC suspend na so so protest upon protests by different groups dey happun for Rivers State, southern Nigeria.

Image copyright INEC Nigeria

Nigeria election office on Thursday 21 March announce say dem go use one more month to torchlight and conclude Rivers State govnorship and House of Assembly election results.

Festus Okoye, wey be oga in-charge of Voter Education for INEC say for Rivers State wia di commission bin suspend election of 9 March, di commission go do di following;

  • 29 March, INEC go meet Inter-Agency Security for Port Harcourt
  • 30 March, INEC go meet critical stakeholders like candidates, observers and political parties
  • 25 to 31 March, INEC go revalidate electoral officers, meaning dem go torchlight & re-register INEC workers.
  • 2 to 5 April, INEC go resume collation and counting of di remaining results
  • 13 April, INEC go conduct extra (supplementary) election for places wia di 9 March election no happun.
  • 13- 15 April INEC go announce all results wey concern Rivers State govnorship and House of Assembly election.
  • 19 April, INEC go give Certificate of Return to winners.

Another thing we de for inside dis tori