INEC don declare say na PDP Candidates win 2019 General Election for Zamfara State
Nigeria election office INEC on Saturday declare say candidates of di kontri main opposition PDP na im win 2019 election for Govnorship, State House of Assembly and National Assembly votes inside Zamfara State.
Wetin INEC do na to obey di Supreme Court judgement wey land on Friday, wey di highest court say APC no get legit votes inside di state.
Chairman of INEC, Prof. Mahmood Yakubu wey make di declaration say na sake of Friday Supreme Court Judgement on Zamfara State Elections na im make dem change di winners wey before now na APC party to PDP.
Oga Yakubu say na on Monday May 27, 2019 INEC go give Certificate of Return to di PDP candidates wey don trun winners.
During di declaration, di INEC chairman declare Dr Bello Muhammad Mutawalle wey be PDP Govnorship Candidate as di governor - elect of Zamfara State.
"For di National Assembly and state assembly election, we bin no get wahala but for governorship, we gatz consider di candidate wit ogbonge majority and PDP candidate Bello Muhammad Mutawalle na im win di election."
Oga Yakubu explain say afta dem give deadline for Primaries, APC as a political party bin no do primaries and because of dat, di commission bin refuse to recognise dem, but last last, dem cari di mata go court to go get judgement.
Meanwhile, di Govnor of Zamfara state Hon ( Dr ) Abdulaziz Yari Abubakar say im goment and APC members for di state accept di Supreme Court judgement wey cancel di elections of di state APC.
Di Govnor tok say di party members and dia supporters inside di state bin do everitin possible to make sure say APC no loss Zamfara state but as Allah want am, di party loss di state.
E advice all members of di party and oda citizens inside di state to remain calm, peaceful and obey di law.
Just before di March 9 govnorship vote, some APC pipo dem bin mount plenti pressure on top di mata wey force di commission to include dem for ballot paper.
Di INEC Chiarmo come draw ear give politicians and political parties, say make dem dey follow due process instead of wuru-wuru for primaries so as to avoid wetin happun for Zamfara state.
Tori be say as Supreme Court rule on Friday say di votes wey pipo cast for All Progressives Congress (APC) party no legit, di party don lose all di 2019 state Govnorship, National Assembly and State House of Assembly elections wey happun inside Zamfara State, northwest Nigeria.
Di court rule say na because say dem no conduct valid primary for di state.
Di court support wetin di ruling wey di Court of Appeal for Sokoto give on top di mata and di five man panel tok say party wey no get candidate no fit tok say dem win election