Yahoo-yahoo training school: EFCC don arrest di proprietor and students of one centre
Nigeria Economic and Financial Crimes Commission (EFCC) Lagos Zonal Office, say dem don arrest di proprietor and students of one 'yahoo yahoo training school' inside Lagos, south west of di kontri.
EFCC arrest di proprietor, one 22 years old man, togeda wit eight students of di yahoo-yahoo training centre wey dey for Ojodu Berger area of Lagos as dem dey receive lectures on internet fraud activities.
- Zlatan and odas don free but we still hold Naira Marley - EFCC
- To do boyfriend with yahoo boy na di easiest way to die - Nigeria Police madam
Acting tok-tok pesin for di EFCC, Tony Orilade, confam to BBC Pidgin say wen dem get first hand informate about dis yahoo-yahoo training school, dem come go undercover to burst di operation.
"We do undercover operation and we even act as part of di students for di training school. We get firsthand information because we dey part of di students."
"Di boys dey feel say Yahoo-yahoo na business and we dey say no, dis no be way of life or business. You can imagine di owner na just young boy of 22 years, e dey intelligent but negatively intelligent."
E add say di scheme of work, di content and curriculum make di school dey under di category of yahoo-yahoo training school.
Di ages of di students na 24 years, 29 years, 23 years, 21 years 19 years 22 years, and 20 years.
For one statement to tori pipo, oga Orilade say:
"Di items wey we recover from di suspects at di point of arrest include nine laptops, 16 mobile phones, one Airtel modem, Orange Wifi and one Toyota Camry."
EFCC say dem go soon charge all di suspects to court.
Meanwhile, Oga Orilade say EFCC no know if oda yahoo-yahoo training school like dis still dey , but dem dey advise pipo for public to give dem more informate if dem find out any like dat to helep EFCC do dia work wella to stop interment fraud.