Buhari campaigner para as EU final report fault Nigeria 2019 election
President Muhammadu Buhari campaigner para as EU election observation mission release dia final report about Nigeria 2019 elections on Saturday.
Di European Union Election Observation Mission final report say failures full inside di conduct of di election, according to di Chief Observer of di Mission, Marie Arena.
For inside di report, di EU Mission demand urgent need to improve di process wey di kontri dey take range election and restore faith inside di system. Di report contain 30 recommendations wey fit improve future elections.
But Festus Keyamo wey be tok-tok pesin for Buhari Campaign Organization during di 2019 election inside Nigeria say di report no cover all di tins wey happun for 120,000 voting points where election take place across Nigeria and so therefore im no accept di whole report.
"Di result show di overall wishes of Nigerians, dat na im be di report by so many observers, if you be one observer you suppose come to final conclusion, no dey dodge about am, no run away from dat fact because we get 120,000 polling units across di kontri and in all dia report I no tink say dem discuss more than 500 polling units." Oga Keyamo tell tori pipo.
"If you observe some kain tins wey no pure, e fit don happun for more than 500 or 1000 polling units and if you observe 'kparakpo' inside those polling units how dat one come totally affect results coming from 120,000 polling unit." Buhari Campaigner tok.
Earlier, EU Chief Observer Maria Arena for press conference for Abuja on Saturday afternoon say; "Dis reform need political leadership wey dey dedicated to di rights of di citizens of Nigeria and national dialogue wey go include state, parties, civil society groups and di media."
"Dis gat happen now now to create time for debate, changes to di law and implementation for di next elections." She add.
Overall, di EU EOM conclude say di elections get plentu operational and transparency shortcomings, election security problems and low turnout. Di report add say Nigeria election office INEC work inside difficult environment and even say dem make some improvements, such as simplifying voting procedures, still on still weaknesses remain.
Di report make 30 recommendations but dem tok say dis seven na di most important.
1.Improve di process wey INEC dey use collect result to improve di integrity and confidence of di outcome.
2.Establish law wey go make public get access to di informate of di full results.
3.Strengthen INEC operations and organisation, as well as how dem dey communicate among themselves.
4.Di join-bodi wey go help with security for elections gats work with everybody including political parties and civil societies.
5.Introduce law wey go make political parties get minimum representation of women among dia candidates.
6.Election tribunals gats cover pre-election cases to help improve solutions, so pipo no go carry petitions to different courts at once.
7.Reform licensing for broadcast media so we fit get different media for all Nigerian states.
Nigeria election office, INEC alreadi tok on Friday say dem go accept di report and work on di recommendation.
INEC Chairman, Prof. Mahmood Yakubu make di promise wen him and members of di European Commission do one meeting wit di Chief Observer of di European Union election observation mission (EU-EOM) to Nigeria, Maria Arena (MEP), inside INEC Conference Room, Abuja, Friday 14th June 2019.
Meanwhile Nigerian President Muhammadu Buhari don tok say na technology help im first win for di 2015 general elections after im try three times.
For interview wey im do with tori pipo Premium Times, him tok say di card readers make am difficult for pipo wey dey write fake results. Him add say God use technology bring am in and na di correct time wey God mean for am.
Dis interview dey come after di Independent National Electoral Commission deny say dem get server for di results of di February 23 presidential election wey dem upload.
President Buhari also tok about im plans for im second term as he say im go focus on security, economy and corruption. Im also add say some of di things wey dem tok say dem go do for 2015 still dey in motion and dem go improve on wetin dem don already start.