COZA Pastor tell members make dem no fight pipo sake of im rape allegation

Senior Pastor Biodun Fatonyinbo Image copyright COZA/Instagram

Senior pastor of di Commonwealth of Zion Assembly COZA advice im members make dem no fight sake of rape allegation.

Pastor Biodun Fatoyinbo bin make surprise appearance for di end of church service wia im address im members make maintain peace and no confront anybody.

"If I no be pastor, I go still remain member of di church," na so im tok.

Meanwhile di church don suspend im seven days glory event wey suppose start for July first.

On June 28, former member of di church Busola Dakolo accuse di pastor of rape for video interview wey she do for YouTube.

But pastor Fatoyinbo don deny di accuse and in dey threaten to cari Dakolo go court.

Image copyright @biodunfatoyinbo/@busoladakolo
Image example Biodun Fatoyinbo and Busola Daokolo

Tension evriwia

Tension dey evriwia for di venue wia protesters gada for front of Commonwealth of Zion Assembly COZA headquarters for Abuja as anoda group of protester don show wey dey protest for Pastor Biodun Fatoyinbo.

As e dey now, na two group of protesters dey face demsef for di front of COZA headquarters for Abuja.

Meanwhile, COZA church members gada for front of dia Abuja church to form barricade to prevent di protester make dem no enta dia church.

From early morning na Busola Dakolo supporters first begin protest, but as di protest dey develop dey go, anoda group wey dey support COZA senior pastor later show to do dia own protest.

Protest turn rowdy afta police and Civil Defence men prevent di pipo wey dey do i-no-go-gree make dem no enta di church.

Some of di church members do physical fight sef wit some protesters to defend dia senior pastor.

Tight security

COZA church members go church today inside tight security.

Tori be say dem search evri pesin wey come church to day before dem allow dem enta church for worship for di Lagos branch od di church.

Protest dey happun for Lagos and Abuja on top alleged accuse say Senior Pastor of Commonwealth of Zion Assembly COZA, Biodun Fatoyinbo, rape popular Nigeria Musician wife Busola Dakolo.

Di #ChruchToo Movement for Abuja and di #NameAndShame Movement for Lagos plan to do protest march go di headquarters for Abuja and di branch for Lagos.

Another thing we de for inside dis tori