BBNaija 2019: Stripper, Awolowo grand pikin, 'Port Harcourt first daughter' storm Big Brother house

Seyi Awolowo, Symply Tacha and Tuoyo. Image copyright dstv nigeria

Di fourth season of di Big Brother Naija reality TV show bin start yesterday 30 June wit 21 housemates.

Big Brother no joke at all wen im tag dis year show "Pepperdem", as dem bring some strange mix of contestants enta di house dis year.

See some of di housemates wey dem select wey shock Nigerians no be small.

Di part time stripper

Image copyright dstv nigeria

Tuoyo Ideh na psychotherapist, fitness coach but wen im no dey do dis two work, you go find am dey work as part time stripper.

Di 23 year old say im no like pipo wey get body odour.

Obafemi Awolowo grand pikin

Image copyright dstv nigeria

Seyi Awolowo, di grand pikin of di late Chief Obafemi Awolowo na part of di contestants of di 2019 edition of Nigeria reality TV show, Big Brother Naija.

Wen di show host Ebuka Obi-Uchendu ask Awolowo wetin im dey find for di show, im ansa say, "I dey here for di experience."

Chief Obafemi Awolowo na di first Premier of di former Western Region for Nigeria from 1954 to 1960. Chief Awolowo na also one di main pipo wey bin fight for Nigeria independence.

Port Harcourt first daughter

Image copyright dstv nigeria

Social media sensation, Symply Tacha wey dey call herself di 'Port Harcourt first daughter' trend for social media yesterday afta dem reveal her as one of di contestants of di Big Brother show.

Tacha bin go viral for di first time on social media afta she say no to her 'boyfriend' proposal on her birthday.

She later announce say di proposal na fake wey she and di guy bin plan together as social media strategy.

Future Olympian

Image copyright dstv nigeria

Mike Edwards na one of di housemates wey shock Nigerians wen dem find out say im be athlete wey dey plan to represent Nigeria for di next Olympics.

Plenti pipo begin ask say wetin 'future Olympian' dey find for Big Brother house.

Well as e be so, many Nigerians and even pipo around di world go follow di show for di next 91 days for all di drama and to see who go be di winner.

Another thing we de for inside dis tori