Shiite protest: Nine police injure afta demonstration turn violent for National Assembly
Police command for Abuja Nigeria capital, say nine of dia officers injure as members of di Islamic Movement of Nigeria (IMN) try to use force enta di National Assembly on Tuesday, 10th July, 2019.
FCT Police Public Relations Officer, DSP Anjuguri Manzah say police stop di shiite members not to enta di national assembly and later arrest 40 of dem ontop dia protest wey cause katakata.
- Hundreds of Shia dey protest again for Abuja
- El-Zakzaky pipo carry protest go wia foreign minister dey meet diplomats
Oga Anjuguri say di group first pretend to dey do peaceful procession before e come later turn violent, then police wey dey ground come take action quick-quick to drive dem comot without using too much force.
E say during di violent protest, Members of di sect shoot two police officer for leg, and also use clubs and stones take injure six oda policemen.
DSP Anjuguri Manzah add say dem don take di policemen wey injure go hospital for treatment.
Local media bin report say suspected members of di Shiite group clash wit security agents for di National Assembly and both pipo from group and di police force injure.
Meanwhile, di Shiite members say, dem dey protest say dia leader Sheik Ibrahim El-Zakzaky still dey for detention. Dem deny say dem cause any damage to anybodi or vehicles as dem dey enta di complex of di National Assembly.
Di incident lead to di closing of all gate wey lead to di the National Assembly premises.
Di Shiite members don dey call for di release of dia leader wey Nigerian authorities detain since 2015.
Dem don involve for some kain of protests before wey lead to fight-fight and bloodshed.