Wetin pipo dey tok ontop CAN position for COZA

Oga Fatoyinbo Image copyright Instagram/@biodunfatoyinbo
Image example Oga Fatoyinbo bin dey church last Sunday but e no clear if im preach

COZA don enta tori again afta video comot say di Christian Association of Nigeria North Central and Abuja chapter presido go dia Abuja church on Sunday to show support for di church on top di rape accuse Biodun Fatoyinbo dey face.

For video wey go viral, dem tok say dem dey support di church in prayer.

Di chairman of di North Central zone of CAN, Rev. Israel Akanji, tok say, "We no fit look away wen di church dey go through dis Jerusalem-Jericho road. We dey pray for una say, our pastor go continue to be di voice of God. We want make you know say you no dey alone, say you get plenti brodas and sisters wey dey pray for you."

While di FCT association chairman, Rev. Jonah Samson, tok say, "We dey support your pastor. We stand by am and dis church go continue to dey match forward and di gates of hell no go prevail."

Well di joinbodi of Christians don enta fire on top dia message for COZA church yesterday even as some pipo for social media dey tink say dem do well.

Pastor Fatoyinbo enta wahala for June wen singer Timi Dakolo wife, Busola come out to accuse am of rape wen she be teenager. Di Pastor don deny di accuse. Im tok say e never rape anybodi before.

Afta dat time, oda accuse and protest don happun to demand say make Fatoyinbo step down from pulpit.

CAN bin comot for statement dat time say, dem no go jump into any conclusion on top information wey dey fly for social media but dem condemn rape.

BBC News Pidgin try to contact di National chapter of CAN but we never fit get any response from dem.

Another thing we de for inside dis tori