Nigeria: Samson Siasia dey beg im mama kidnappers say make dem free her

Samson Siasia dey beg say make di kidnappers free im mama Image copyright Getty Images
Image example Samson Siasia dey beg say make di kidnappers free im mama

Former Super Eagles Coach Sampson Siasia dey beg di kidnappers wey gbab im mama make dem release her.

BBC Pidgin get dis gist from Radio Nigeria tori pesin Alambo Datonye wey interview di former Super Eagles coach.

Im confam say di kidnappers dey demand N70 million from di family to release im mama.

"I dey beg di pipo wey take my mama say make dem release her. All of us na Bayelsans. Pesin no go fit tiff from im own house. I dey beg una make una release her. For di past three years she no too well. Abeg na old woman. Na mama." Na so im tok.

Di former Super Eagles Striker and Coach say as for di ransom wey dem dey ask, N70m im no get dat kain money come add say im dey fear if she go fit survive.

Im follow appreciate Nigerians for all di support dem dey give am as dis tin happen so.

Wetin exactly happen?

Di jaguda boys wey kidnap di mama of Samson Siasia former Super Eagles Coach, Madam Beauty Ogoere Siasia dey demand N70 million naira before dem go free her.

Image copyright Getty Images

Pesin from di Siasia family tell BBC Pidgin say di pipo wey ask for di ransom also tok say dem wan tok to Siasia imself but im no dey di kontri.

As dis one dey comot di Police for Bayelsa State Police Command neva confam di demand for ransom.

Dia Police tok tok pesin Asinim Butswat tell BBC Pidgin say dem neva get dat kain informate from di family.

"We don visit di family two times. I no know anytin about dat one. We no dey aware."

Na for early mormor of Monday 15 July around 2am na im di kidnappers gbab Siasia mama from dia house for Odoni, Sagbama Local goment area of Bayelsa State. Dem also gbab two oda women, Madam Florence Dounana and Selekeere Dounana.

Dis na di second time dem dey Kidnap Siasia mama as dem bin don kidnap her before for November 2015 and she spend 13 days with di kidnappers before dem free her.

Another thing we de for inside dis tori