BBNaija: Khafi go comment on UK Police mata wen she comot
Khafi Kareem, di Nigerian UK Police officer wey dey face investigation say she appear for di Big Brother Nigeria show without permission go comment on di mata wen she comot di house.
Dis wan na afta UK Metropolitan Police confam give BBC Pidgin say dem dey investigate her as dem no give am permission before she go appear for di BBNaija show.
But one tok-tok pesin wey respond to BBC Pidgin say she currently dey di Big Brother House with no access to her phone as part of rules of di game.
Dem add say she go comment on di mata wen she fit.
Di Media and Communications Manager for di Press Bureau of di UK Metropolitan Police, Rebecca Byng, bin tell BBC Pidgin say dem dey aware say one of dia officer dey for Big Brother Nigeria show and dem don inform dia director of professional standard to carry out investigation on top di issue.
"One PC, wey dey attached to di Met transformation command, request permission to take part for one reality television entertainment show inside Nigeria. We no give her permission."
"Di Met dey aware say di officer go appear for di show without di authority permission."
"We don inform di Directorate of Professional Standards and dem go carry out investigation into di circumstances."
For di statement wey di oga madam Rebecca Byng send give BBC Pidgin, she say di Met no support di officer appearance and she no represent di Met as she appear for di show.
She say all police officers get duty to behave wit professionalism and for manner wey no go bring bad name to di Met weda on or off duty. Those wey no behave professionally dey at risk of going against di police standards of professional behaviour, and dem go deal wit dat kain behaviour.
Di statement conclude say, before dem refuse Khafi request to go di show, She bin don request some period of unpaid leave for anoda reason wey no dey related to di show. Dem authorise dat one, and she dey within di unpaid leave period currently.
Khafi close relationship wit her fellow housemate, Ekpata Gedoni bin don cause plenty tok-tok for social media and even inside di house.
Part of di statement wey Khafi management release afta tori say dem go investigate her come out tok say:
"Khafi na proud black female police officer wey dey pride herself for her work and she don dedicate her youthful years to protect and serve wit her many skills wey include di ability to speak at least five international languages."
For Khafi profile inside Africa Magic website, she bin tok say she join Big Brother Naija to "do societal good" and she go use di prize money hire feem crew and host travel show round evri state for Nigeria, to showcase di tourist beauty spots plus also invest for charity.