Woman wey lock boy for dog cage flog am for Lagos tok why she do am

Woman wey appear for viral video Image copyright Instagram/@opetodolapo

One Onyinye Mbadike wey police bin arrest afta she appear for viral video wia she dey flog one small boy wit belt come lock am inside dog cage, don explain why she do dat kain tin.

Inside statement wey di Lagos Police PRO Bala Elkanah send give BBC Pidgin, di 24-year-old Mbadike claim say she flog 10-year-old Chibike EziAmaka sake of say im drink alcohol come dey misbehave sotay im smash di side mirror of her moto wit stone.

Police confam to BBC Pidgin say di incident happen for Aguda, Lagos state, Nigeria. Dem add say di boy na Mbadike cousin and im don dey live wit her since 2012.

Chief Superintendent of Police, Badmos Dolapo wey share di report for her social media on Thursday August 15, 2019, say dem don dey find di woman since di video trend for internet recently.

Di video wey show as one woman use belt dey flog one small boy before she push di pikin inside dog house, make Nigerians para. Kontri pipo bin don dey demand for her arrest.

Di CSP say na informate wey dem get through some Nigerians helep di domestic violence response police team to arrest di lady.

As e be so, police don rescue di boy wey dem say be orphan, keep am for shelter wit Lagos State gofment.

Di woman dey police custody now and dem go charge her go court.

Topics Wey Dem Resemble

Another thing we de for inside dis tori