Headies 2019: All di tins wey Nigerians tok say no gel, full winners list

Falz wit im awards Image copyright Instagram/falzthebahdguy
Image example Falz na one of di winners of di night

Dis year, di Headies 2019 awards honour some of Nigeria ogbonge musicians like Burna Boy, Teni, Falz, Chinko Ekun and many more.

Di Headies na one of di ogbonge awards wey dem torchlight Nigerian performers and plenti pipo dey always look forward to am every year.

Correct gist dey always follow di event and di 2019 edition no dey different at all, as pipo don go social media to tok some of di tins wey dem feel no work for dem as dem dey watch di award.

No Chemistry

Dis year edition happun for Lagos, Nigeria with Reminisce and Nancy Isime as di hosts of di event. However, many of di pipo wey watch di event from dia house tok say di two of dem no gel togeda, wetin oyibo pipo dey call 'chemistry', as dem no feel say di two of dem connect well.

A lot of di artistes no show

Dis one na something wey pipo no like at all as some of dia favourite artistes - even di ones wey dey nominate no show for di ceremony. One of di notable pipo wey no dey na Wizkid wey bin dey London for im Starboy Fest show. And as Naira Marley and Burna Boy perform wit am dia, dem too no show.

Still, pipo no like how winners on di night no show to collect dia award.

Regina Daniels mama present artiste of di year

Anoda tin wey make pipo dey scratch head wonder na when Regina Daniels mama present artiste of di year award for di show. Di tok be say no be her scene and she no even dey di industry so why she go dey present for di Headies.

Although e no be new tin for di Headies to use pipo wey no dey di industry to present awards.

No be all complain wey pipo tok about di Headies. Some things wey happun sweet pipo for belle like how Falz carry award for im album Moral Instruction; and DJ Cuppy and Bovi wey present Hip Hop World Revelation as dem dey lick gelato.

Di Headies na music award show wey dey celebrate pipo wey don do big tins for di Nigerian music industry.

See di full list of all d winners for di Headies here.

Topics Wey Dem Resemble

Another thing we de for inside dis tori