Russia-Africa Summit: Wetin Nigeria, Ghana, Cameroon fit benefit from Putin

Muhammadu Buhari (left) and Vladimir Putin (Right)

Wia dis foto come from, Bashir Ahmed/Twitter

Wetin we call dis foto,

Muhammadu Buhari (left) and Vladimir Putin (Right)

Nigeria president Muhammadu Buhari and Ghana president Nana Akufo-Addo follow among di African presido wey show for di first eva two-days Russia-Africa summit wey dey happun for Sochi, Russia.

Di co-chairman for di summit na Egypt plus chairmo of Africa Union president Abdel Fattah el-Sisi and Russia president Vladimir Putin

More than 40 African leaders plus 3,000 delegates na im dem expect to participate before di summit end on 24 October.

Cameroon president Paul Biya bin plan to travel for di meeting but im cancel for last minute. E neva clear why.

President Vladimir Putin wen him open di Russia-Africa Economic Forum on Wednesday afternoon say Russia na one of di ten biggest food suppliers inside African market. Oga Putin even promise to double trade with Africa in five years.

Wia dis foto come from, En_forumafrica

Wetin Nigeria, Ghana, Cameroon fit benefit

Di major focus of di summit na to torchlight different mata wey concern peace, security and development between Russia and African kontris.

For im address during plenary session, Russia president Vladimir Putin say, "economic mata and topic na di koko of di Russia-Africa relationship and di real priority."

Issues like digital transformation as di driver for development na anoda interesting topic modern technology na di koko for Africa to take enta di future.

On to security, Russia dey also offer nuclear power technology for many African kontris.

For natural resources mata, tori be say Russia get clear economic intention to join bodi wit Africa, as di kontri get shortage of some minerals such like manganese, bauxite and chromium.

Already, one private Russian energy giant Lukoil according to tori, get or dey do projects inside Cameroon, Ghana and Nigeria.

Wia dis foto come from, Bashir Ahmed/Twitter

For security mata, Nigeria don already get weapons deals wit Russia between 2017-2018 and latest tori be say President Muhammadu Buhari go hold security tok tok wit President Vladimir Putin.

According to Malam Garba Shehu, di Senior Special Assistant to di President on Media and Publicity wey yarn just days before di Sochi meeting start, di two leaders go discuss arms and weapon procurement to assist Nigeria to end di insurgency, particularly di Boko Haram activities inside North East region of di kontri.

Wia dis foto come from, Presidency Nigeria

Inside one interview wit Russian Tass goment news agency ahead of dis week summit, President Putin say: "Russian-African relations go offer:

  • political and diplomatic support
  • defence and security help
  • Economic assistance
  • disease-control advice
  • humanitarian-relief assistance
  • educational and vocational training

Wia dis foto come from, Presidency Nigeria

Russia dey also target to create Africa Continental Free Trade Area.

As one of di ten biggest food supplier to Africa, Russia want make dem chook eye for di mata of sustainable partnership for agriculture.

Di expectation be say by di end of di different meetings, Africa leaders go sign economic and military cooperation agreement plus including oda kains of agreement wit Russia.

But in terms of overall economic padi-padi alias buying and selling, Russia still dey do much more trade wit Europe and Asia than wit Africa. So di expectation be say dis na di beginning of a new relationship.