Maina: Nigeria former oga of Pension Reform Task Team go collect self contain for prison
Federal High Court pass order on Friday afternoon say make former chairman of di Pension Reform Task Team (PRTT), Abdulrasheed Maina go collect self contain for prison.
Justice Okon Abang wey give di ruling say di trial go start on di 30 October and di trail go be everiday and e no go entertain any application for adjournment.
EFCC bin cari former oga pension go court ontop 12 count charge but afta court read di charges give oga Maina e say im no dey guilty.
Di EFCC lawyer Mustapha Abubakar say im dey prepare to start trial immediately as im witnesses dey court.
But di defence lawyer, Ahmed Raji (SAN) say im no ready for trail becos since dem arrest im client, dem no give am time to meet wit am and prepare for di case.
E say since Maina dey EFCC na only once e don see am and na only five minutes dem give an to tok wit am.
E say e don write bail application and wan argue di mata to allow im client get bail.
But di prosecution lawyer say no way as e don write di application before di real arraignment wey be on Friday.
Afta di two lawyers dem argue finish, Justice Okon Abang say wit regards to fair hearing, e ask day make dem cari Maina go Prison.
And wen e dey prison (Nigeria Correctional Centre) make di officials wey dey dia make sure say dem allow am meet im lawyer.
Justice Okon give di Defence counsel four days to prepare for im case. And e give am ten days to file for im bail application and anoda ten days for di prosecution to respond in writing.
E come adjourn di mata to di 30th of October for di commencement of trial.
On Tuesday 22 October, Justice Folasade Giwa-Ogunbanjo of di Federal High Court bin order Maina to surrender 23 landed properti wey dem trace to am.
Some of di properti na houses, estates and companies wey dey Abuja, Kaduna, Borno and Nasarawa states.
Meanwhile im son, Faisal Maina plead not guilty to the three count charge wey border on money laundering. Di Court adjourn to 6th November for im trial to start.
Di presiding judge, Justice Okon Abang as dem to take am go lock for Police Tactical Squad pending wen im trial go start.
How Maina mata don waka
•2010 - Chairman of di Presidential Task Team on Pension Reforms
•2012 - Dem accuse am of corruption
•2013 - Dem sack am from federal civil service
•2015 - E enter EFCC wanted list
•2015 - Dem say e begin hide (tori be say e dey for Dubai)
•2017 - Dem appoint am acting Director Human Resources for Interior ministry
•2017 - October 23. President Buhari sack am again from civil service
•2017 - E still dey under investigation… tori be say im don go into hiding