Ipob: Why Nigerian Police declare Ifeanyi Ejiofor wanted for Oraifite killings

Ifeanyi Ejiofor Image copyright Ifeanyi Ejiofor/Facebook

Police don tell BBC say dem want Ifeanyi Ejiofor, wey be Nnamdi Kanu lawyer to come explain wetin him sabi about di killing wey hapun for im domot for Oraifite village, South East Nigeria.

Tori be say gbege start wen two jaguda groups wey no dey cari eye see each oda clash for di domot of oga Ejiofor during di burial ceremony of one of im relatives on Saturday 30 November, 2019.

One pesin wey sabi wetin happun for Ifite village inside Oraifite, Ekwusigo local goment area of Anambra State na im tell BBC.

During di clash, blood pour for ground (although di BBC never fit independently verify di nature of di clash wey happun) di villagers report di mata to di police.

Na dia one Area Commander from Nigeria Police go Ejiofor house inside Oraifite to go find out wetin happun.

Anambra State Police Command tok-tok pesin, Haruna Mohammed confam say two police officers including Oliver Abbey wey be di Area Commander for Oraifite meet dia death wen dem go Ifeanyi Ejiofor domot to arrest am ontop di complains of fight-fight, palava and suspected kidnapping wey villagers report against am.

Image copyright Haruna Mohammed

SP Mohammed say pipo wey dem suspect to be Ipob members (wey goment don ban and declare as terrorists) na im attack di team of police men, burn dia motor and kill two police officers come wunjure odas.

Di late Oliver Inoma-Abbey wey bi Assistant Commissioner of Police (ASP), na Chief-Elect for Bonny local goment area of Rivers State, south-south Nigeria, wey go work for Anambra until im meet im death.

But President-General of Ohanaeze Ndigbo, Nnia Nwodo don frown face condemn di mata.

Oga Nwodo vex for wetin im say be di recent police attack and alleged burning down of di house of di lawyer to di Indigenous People of Biafra (IPOB), Ifeanyi Ejiofor.

However Police on Tuesday, 3 December, 2019 declare Ejiofor wanted.

But Nnamdi Kanu lawyer don post video for social media to deny knowledge of wetin happun.

Ifeanyi Ejiofor tok say police don make am homeless.

Nnamdi Kanu however tok for im social media account say na two Ipob members na im dem kill for Oraifite.

Pipo don japa find dia level comot from Ifite wey be one village for Oraifite, Anambra State, sake of di wahala.

Anambra State House of Assembly on Tuesday beg di state Commissioner of Police, John Abang, to bring to justice all di pipo wey get hand inside di mata.

Topics Wey Dem Resemble

Another thing we de for inside dis tori