Sowore rearrest: Buhari goment defend why Nigeria secret police gbab di Publisher of Sahara Reporters

Sowore
Image example Nigerian goment bin file seven count charges of treasonable felony and money laundering for September 2019 against Omoyele Sowore for leading di #RevolutionNow protest to demand for good goment wey happun for August 2019.

Nigeria President Muhammadu Buhari on Sunday defend di decision of di kontri secret police to rearrest Omoyele Sowore, di Publisher of Sahara Reporters.

Garba Shehu, wey be di main tok tok pesin to di President say no goment go allow anybodi to come out say dem go scata di kontri without doing anytin.

Di goment statement wey oga Shehu sign and release on Sunday 8 December, 2019, say Sowore na pesin of interest to di DSS - Department of State Service (wey be di kontri secret police).

Sowore call for revolution to overthrow di goment of President Muhammadu Buhari wey pipo elect under democracy inside Nigeria on 23 February, 2019, according to di statement.

Dis goment statement dey react to how DSS dey treat Omoyele Sowore mata afta dem rearrest am on Friday 6 December, just 24 hours wey dem bin release am from 124 days detention.

"DSS no really need permission from di office of di president for all cases before dem go fit do dia work wey dey inside Nigeria constitution - wey be di foundation of di democracy of di kontri since 1999. Na wetin di statement add put.

Image copyright Sahara Reporters
Image example Omoyele Sowore, bin contest di February 2019, Presidential election under AAC and e score 33,953 votes.

On Friday, 6 December DSS rearrest Oga Sowore from inside court compound for Abuja, afta dem bin release am on Thursday 5 December wia im don spend 124 days since im first arrest ontop dis mata.

But di kontri secret police later release statement on Saturday 7 December, wey tok say no be dia men enta court to rearrest Sowore.

DSS insist say na Sowore guys na im stage di abracadabra drama wey bin happun inside court.

But Sahara Reporters wey be di tori pipo wey dey work for oga Sowore say wetin di DSS tok for statement no pure.

Di Department of State Service even tok say shortly afta dem free Sowore on Thursday im begin do press conference dey tok tins wey be threat to national security.

But Sowore Lawyer, Femi Falana tok for one TV interview say "up till now we neva understand why DSS arrest my customer."

Oga Sowore dey face seven count accuse from Nigerian goment of treasonable felony and money laundering.

Di President office say "e no suppose surprise anybodi wey dey follow Oga Sowore behaviour and action to know say im go be pesin wey DSS go dey interested in.

Di next date for Sowore case for court go be February 11, 2020.

Di mata don attract plenti reactions across Nigeria and abroad.

Topics Wey Dem Resemble

Another thing we de for inside dis tori