DSS free Sowore afta Attorney General order im release

Omoyele Sowore

Wia dis foto come from, Facebook/Omoyele Sowore

Nigeria secret police, Department of State Services don release publisher of Sahara Reporters, Omoyele Sowore.

Dis na afta Attorney General of Nigeria and Minister of Justice, Abubakar Malami direct make Nigeria secret police release Omoyele Sowere and Sambo Dasuki on Tuesday.

Na di second time wey di DSS go release Sowore afta dem first free am on 5 December 2019.

Oga Malami order of release come afta di Department of State Security re-arrest Sowore for Federal High Court for Abuja on 6 December, 2019.

On 13 December, 2019, oga Malami bin take ova di case of Sowere from Nigeria secret police.

Nigeria goment bin arrest Sowore for August 2, 2019 say im commit treason, dem later release am for December afta e spend more than 3 months for detention.

DSS bin arrest Dasuki for 2015 say im allegedly steal $2.1bn and accuse am say e award 'fake' contracts to buy 12 helicopters, four fighter jets and ammunition wey Nigeria military suppose use to fight Boko Haram.