Oxford English Dictionary don add 'Danfo', 'Okada', 'K-leg' and oda Nigerian Pidgin - Check out di meaning of di words

Pesin wey dey read Oxford dictionary Image copyright Other

Some common Nigeria Pidgin English like Danfo, Okada, K-leg, Buka, Mama Put and odas don finally enta dis month update of di Oxford English dictionary.

Oda pidgin and Nigerian kind of English words plus dia meaning and pronunciations wey make am to di dictionary na; bukateria, guber, agric, ember months, next tomorrow, Kannywood, Sef, Chop, Chop-chop, to eat money, barbing, salon, gist, to gist, put to bed, tokunbo, to rub minds and many odas.

Oxford tok say for dia Website say Nigeria way of communication don make ogbonge contribution to English Language all ova di world.

"Wit di way Nigerians take ownership of di English and dey use am as dia own medium of expression, Nigerians don make plus continue to make ogbonge contribution to English as global language."

Di organization tok dis afta dem make reference to one quote of Nigerian writer, Chimamanda Ngozi Adichie wey say her "English-speaking dey rooted on her Nigerian experience."

Oxford add say just as Chimamanda tok, dem dey hope to give flavour of English-speaking wey dey based on Nigerian experience by focusing on modern language for dis new update, and adding words and phrases wey form part of di everyday word of today Nigerians.

Dis na di words and dia meaning as e appear for inside Oxford English Dictionary.

Words Meaning How to pronounce am
agric (Adjective & noun.) adj. improved or genetically modified kind of crop or breed of livestock, especially one type of chicken wey dem train to grow big quick-quick.n. Agricultural science as subject or course wey student dey lear for school. /ˈaɡrik/
barbing salon (Noun) Barber shop. /ˈbabin saˌlon/
buka/bukateria (Noun) Roadside restaurant or street stall with seating area, wey dem dey sell cooked food for low prices. /ˈbuka/ and /ˌbukaˈteria/
chop (Verb) To eat. /tʃɔp/
chop-chop (Noun) For Ghana and Nigeria English: E mean Bribery and corruption for public life; using anyhow or stealing of funds. /ˌtʃɔpˈtʃɔp/
danfo (noun) Yellow minibus wey dey carry passengers as part of di normal transport system for Lagos, wey be di largest city for Nigeria. /ˈdanfo/
to eat money/ in eat (Verb) To get money through dishonest way; to use money anyhow, extort, or tiff public funds.
ember months (Noun) Di final four months of di calendar year (September to December), wey dem consider as period of plenti or intense activity. /ˈɛmba ˌmɔn(t)s/
flag-off (Noun) Di official start or beginning of event or undertaking. /ˈflaɡɔf/
gist (Noun) Idle chat, gossip. Also rumour or piece of gossip. /dʒist/
gist (Verb) To chat, gossip. /dʒist/
guber (Adjective) Of or relating to governor or governorship. /ˈɡuba/
Kannywood (Noun) Di Nigerian Hausa-language film industry, wey dey based for Kano; Kano na wia dem regard as di centre of dis industry. /ˈkaniˌwud/
K-leg (Noun) One condition wey one or both knees of pesin dey turn inwards, dis go come result to gap between di feet wen e stand with di knees touching; /ˈkeˌlɛɡ/
mama put (Noun) Street vendor, typically woman wey dey sell cooked food for low prices from handcart or stall. Also: Street stall or roadside restaurant wey dis vendor dey run. /ˌmama ˈput/
next tomorrow (Noun & Adverb) n. Di day after tomorrow. adv. On di day afta tomorrow. /ˌnɛks(t) təˈmɑroʊ/
non-indigene (Noun & Adjective) adj. Not native. belonging to ethnic group wey dem consider say no be part of a particular area.n. member of ethnic group wey dem consider not to be indigene of a particular area. /ˈnɔnˌindidʒin/
okada (Noun) motorcycle wey passengers fit use as taxi service. /ɔˈkada/
to put to bed (Verb) to give birth. Also: to give birth to (a child).
qualitative (Adjective) high quality; excellent. /ˈkwɔliˌtetiv/
to rub minds (together)/ in rub (verb) (of two or more pipo) to consider mata togeda; to consult and work togeda; to confer.
sef (Adverb) Used for emphasis afta one statement or question wey no get answer, dem dey often dey use am express irritation or impatience. /sɛf/
send-forth (Noun) Celebration or event to mark di departure of pesin; a send-off. Dem dey use am as modifier, as Send-forth ceremony, send-forth party, etc. /ˈsɛn(d)ˌfɔt/
severally (Adverb) For plenti occasions; repeatedly. /ˈsɛvrali/
tokunbo (Adjective) E mean imported second-hand product, especially car. /toˈkumbo/
zone (Verb) To allocate one nomination for (political office) to one candidate from one particular region, under di zoning system. /zon/
zoning (Noun) Di system or practice to allocate nominations for certain political offices to candidates from particular regions, as part of unofficial power-sharing arrangement within one political party, with di plan to produce balanced regional representation. /ˈzonin/

Topics Wey Dem Resemble

Another thing we de for inside dis tori