Inec declare Douye Diri winner of Bayelsa Governorship election: Takeaways from Supreme court judgement wey cancel APC victory
Di independent National Electoral Commission of Nigeria Inec don declare di opposition Peoples Democratic Party candidate of di govnorship election of Bayelsa state as di winner of di election.
On Thursday, Supreme Court for Abuja cancel Bayelsa State governor-elect David Lyon as winner of di 2019 election for di state.
Di five-man panel of Nigeria highest court declare PDP candidate Douye Diri as winner of di state governorship election.
See wetin you need to know about di judgement.
Di two govnorship candidates of di All Progressive Congress party (APC), di govnor and deputy govnor get joint ticket. So dia for, di decision wey affect one pesin, affect di oda.
Candidates of govnorship electons
Di judgement indict di Deputy-Govnor elect Biobarakum Degi-Eremienyo say im present fake certificate.
So as a result of dia joint ticket, di Supreme Court disqualify di two candidates and dem no be candidates again for di govnorship election.
- Wetin go happun now for Bayelsa State?
- David Lyon don already be Bayelsa Govnor for im mind before Supreme Court break im heart
Inec declare new winner
Since oga David Lyon and im deputy oga Degi-Eremienyo no be candidate again, Supreme Court don order Inec make dem declare di candidate wit di highest number of lawful votes and di right constitutional spread.
Certificate of Return
Dem also order Inec to also collect Certificate of Return from oga Lyon and im deputy hand, den give fresh Certificate of Return to di pesin with di highest number of lawful votes.
INEC don accept di judgement of di supreme court say dem go give di PDP Douye Diri im certificate of return.
Bear ya cost
Di court also rule say all di parties wey follow do dis court case go bear dia cost for all di moni wey dem spend.