Bayelsa Governorship: Police arrest 8 pipo on top Destruction of houses for Yenagoa

Govnor Seriake Dickson hand ova to new govnor Duoye Diri
Image example Govnor Seriake Dickson hand ova to new govnor Duoye Diri

Police don arrest 8 pipo on top palava wey happen for Yenagoa, di Bayelsa State capital afta jaguda pipo attack and destroy houses and offices as di new govnor take ova.

Di jaguda boys scatter di house of di former Govnor Seriake Dickson, personal house for Opolo, di new Govnor Douye Diri house for Imgbi road, PDP state secretariat and Radio Bayelsa premises for Ekeki, Yenagoa.

Na di katakata make di state Police Commissioner Uche Anozia, declare three days curfew to maintain law and order for di State.

Meanwhile Radio Bayelsa dey off air since yesterday afta jaguda boys go destroy tins including cars for di station.

Mrs Vivian Gabriel, Head of Admin, Radio Bayelsa, tell BBC Pidgin say around 11am, dem see jaguda boys with stones enter di premises begin destroy tins and Dem get to shut down.

Doris Francis wey be Sport Analyst and commentator for di station, say as dem wan comot wit di Outside Broadcast van na im dem see jaguda boys wit stones rush inside di compound.

"We hear dem dey shout, who take di breaking news, which of you take di breaking news of wetin dey happen for di State as INEC give certificate of return to di new Governor. So we get to run comot through di swamp wey dey back enta NTA premises. Na so we take escape. Dem destroy my car and even I even get wound sef." Na so she tok.

Many offices and cars of workers for di radio station dey destroyed.

Di decision of di Supreme Court to remove di APC candidates David lyon and Biobarakuma Degi-Eremienyo as govnor elect of di state cause kasala as supporters of di party begin to protest plus scata tins.

Diri Certificate of Return

Nigeria Independent national electoral commission (INEC) issue di people's Democratic Party Candidate, Douye Diri e certificate of return to be di new govnor of Bayelsa State.

Dis na afta Inec say dem accept di Supreme court judgement wey declare Douye Diri as winner of Bayelsa state election.

Di chairman of di commission, Professor Mahmood Yakubu say dem don receive di court judgement and wetin di court ask dem to do.

On Thursday, Supreme Court for Abuja cancel Bayelsa State governor-elect David Lyon as winner of di 2019 election for di state.

Di five-man panel of Nigeria highest court bin declare PDP candidate Douye Diri as winner of di state governorship election.

Di court decision turn table for oga Lyon wey dem for swear into office on Friday, February 14, afta all di plenti preparation wey im don bin dey do for di inauguration.

Another thing we de for inside dis tori