Why emergency team suspend search for man wey jump from Third Mainland Bridge

Rescue teams dey try safe di victim Image copyright LASEMA
Image example Rescue teams dey try safe di man wey jump inside di lagoon

Search and rescue teams for Lagos, Nigeria, don stop di search for di man wey jump enta lagoon from di Third Mainland Bridge on Saturday.

According to di Lagos State Emergency Response Team, LASEMA, di reason why dem suspend di search na sake of di very strong and fast wave of di Lagoon water.

Di divers say, di way di water bin dey move make am hard for dem to fit find di man afta dem don stay too long inside di am.

Dem suspend di search till di Monday.

Tori be say di man bin tell di Uber driver say e wan pee only for am to come down, dive enta di lagoon.

Lagos state police command, say di tin happun around 11 in di morning and all emergency agencies bin dey ground to assist local divers to rescue di man.

Wetin we know about the man

According to Lasema, di man name na Daibo Toju Davies born on 22nd July, 1998.

Dem add say im dey live for number 17 Sosanya Street Gbagada Soluyi Lagos.

Image copyright Twitter/@rrslagos
Image example Emergency rescue teams wey dey ground to rescue di man.

According to Lasema, Mr. Davies bin pick Uber from Mercy Hospital, Gbagada before e jump inside di lagoon.

Dem say dia investigation reveal say di victim inform di Uber driver say belle dey pain am. Afta di driver stop, e come jump off di bridge.

Di Agency response team, togeda with di Lagos Fire Service and Marine Rescue team na im bin dey ground to rescue am.

Topics Wey Dem Resemble

Another thing we de for inside dis tori