Agba Jalingo don regain im freedom afta ova 170 days for prison
Di publisher of CrossRiverWatch, for Nigeria, Agba Jalingo don regain im freedom afta 179 days for prison.
Dis na afta im perfect im bail conditions wey dem grant am on Friday, February 14, 2020.
Nigeria police arrest Jalingo for August 2019, ontop accuse of treason, terrorism and say e try to scata di Cross River State goment. E plead not guilty.
Due to im long detention, Amnesty International bin declare di activist, "a prisoner of conscience".
How di mata waka
Police arrest Jalingo on August 22 afta e tori say di govnor of Cross River State, Ben Ayade, kolobi millions wey belong to di state.
Authorities keep am for Calabar prison, afta Justice Simon Amobeda of di Federal High Court, Calabar, deny am bail.
Mr Amobeda announce im withdrawal from di case afta one secret recording wia ee tok some kain "biased" remarks against Jalingo leak give di press.
Jalingo, for im reaction to di recording, ask say make dem transfer am go anoda court outside Calabar, give new judge.
For im reaction to di mata, Cross River state Govnor Ben Ayade tell reporters say di case na Federal Government versus Agba Jalingo, not Cross River State.
"E dey court for treason, state no get power to try anyone for treason, no be me."
Mr Ayade say di journalist arrest and trial dey in connection with Omoyele Sowore #RevolutionNow protest.
"He put pictures for im Facebook page, wia dem bin teargas am for di revolution march for Lagos. Wen dem arrest Sowore, e go back to im Facebook to post say di revolution just dey start we go continue dis battle until revolution work'. E tom am for Court," Ayade tok.