Uniport: Police dig out deadibodi of three students of University of Port Harcourt wey kidnappers kill and bury

  • Karina Igonikon
  • BBC News Pidgin, Port Harcourt
One of di kidnap suspect, Friday Akpan with Police tok tok pesin, Nnamdi Omoni with di deadibody of di three Uniport student wia dem exhume dem for Eteo, Eleme

Wia dis foto come from, Rivers State Police Command

Wetin we call dis foto,

One of di kidnap suspect wit Police tok tok pesin, Nnamdi Omoni wit di deadibodI of di three Uniport student wia dem exhume dem for Eteo, Eleme

Police for Rivers State southern Nigeria on Friday dig out di deadibodi of three students: two males and one female wey dey school for University of Port Harcourt.

Kidnappers bin don gbab di students; Nelson Nwafor, Fortune Obemba and Joy Adoki on 7 April, 2020 from Choba, one of di host communities of di university and during investigation, on 30 April, 2020 police arrest three of di suspects, na wetin police tell BBC Pidgin.

One of di suspected kidnappers wey police arrest, Friday Akpan, na im carry police go dig out di deadbodi dem for di shallow grave dem bury dem for one bush for Eteo, for Eleme (wey be town wey dey around 20 kilometers east of Port Harcourt) Friday, 1 May, 2020.

Wen dem dig dem out, dem don begin dey rotten.

According to police, Akpan confess say im belong to one cult group and dem don kidnap pipo two times.

Di suspect say na one of dia gang leaders, wey im identify as Bright, na im kidnap di dead students say one of dem betray am because e get money wey enta im account wey im no pay am, so im call dem and dem carri dem come kill for di bush.

Akpan say Bright na im come order dem to kill di students, according to wetin e confess give police.

Di Rivers State Commissioner of Police Joseph Mukan come assure parents of di students wey die say dem go make sure dem do justice for di matter. Di deadibodi of di students dey mortuary now. Police dey plan to do autopsy and more investigate ontop dis mata.

Dis na one crime too many for Pitakwa

Dis no be di first time dis kain crime dey happen as e never too tay for December, 2018 wey police bin don dig out di deadibodi of one girl, Ozigie Wovueze from di bedroom of her boyfriend, Ndema Owabie AKA JBoy for Wimpey area of Rumuepirikom inside Port Harcourt.

For November last year, police also comot one woman, Charity Ohaka wey her killers troway her deadibodyiinside well for Rumuosi (one area wey dey close to University of Port Harcourt) and about three years ago, tori of one Jumia delivery man wey dem kill and bury for soakaway, for Ada George area of Port Harcourt, too bin dey trend.

Dis Jumia case dey on as court still dey torchlight di matter.