BBNaija Erica, Kiddwaya and Laycon ‘love triangle’ - Wetin you need to know

Erica and Kiddwaya

Wia dis foto come from, Big Brother Naija

Drama for di Big Brother Naija house as wetin be like love triangle between Laycon, Erica and Kiddwaya don dey make things heat up for di house.

Dis dey come afta Saturday night party wen Laycon tok say Erica bin dey try to kiss am for di party and im try to protect her from her boyfriend, Kiddwaya.

Laycon don express im attraction to fellow housemate, Erica, sotee im open up tell Big Brother for one diary session say Erica na distraction for am for di house because im like her too much.

But Erica dey for relationship wit Kiddwaya.

Things don dey heat up for di Big Brother Naija house between dis three housemates as nobodi sabi how dis love tori go end.

Dis na wetin we sabi:

Wia dis foto come from, Big Brother Naija

Wetin Erica tok about Laycon

Erica admit to anoda housemate, Tolanibaj on Saturday morning say she no dey attracted to Laycon.

She say "Even if Kid no dey di picture, I no dey interested in Laycon in dat way and I don always tell am".

She add am say she only dey interested for dem two to just tok but no oda thing.

"I know say im mention to me one time say im wish he don mention im feelings to me before I begin date Kiddwaya but even if he tell me first... I just like who I like" Erica tok.

Wia dis foto come from, Big Brother Naija

Wetin she tok about Kiddwaya

Wen di conversation continue and Tolanibaj ask Erica if she want anytin from di relationship wey dey between her and Kiddwaya, she say she no dey sure.

"I just comot from one relationship before I enta di Big brother house and I bin comot mind say I no want date anybody for now,

And I bin no get any feelings for Kiddwaya until we had dat kiss",

She say she no dey look forward to anything serious from di relationship but she no go like make Kiddwaya dey all ova anoda girl again for di house.

Tolanibaj later advise make she no too put mind for her relationship wit Kiddwaya.

Wia dis foto come from, Big Brother Naija

How mata change between Laycon and Erica for Saturday party

As DJ Consequence and LadiPoe dey give di housemates back-to-back hit for di party di Housemates dey dance dey drink. While some of dem fit control dia alcohol intake, some… be like say dem drink too much.

Erica siddon balance well for di table as she start dey display signs say she dey drunk and she go meet Laycon for di party, dey hug, dance and hold on to am.

Under wetin be like di influence of alcohol, both of dem share some intimate moments and dances for di dance floor.

Afta di party wen di housemates don go to bed Laycon later gist wit Praise.

According to Laycon, im say, Erica bin try kiss am for di party and she dey tok things like she dey try avoid Kiddwaya because she dey drunk and she no wan do things wey she go regret for live TV.

Laycon still stress on di mata say Erica for don sleep for im room so make he for keep an eye on her,

"She get her man, stop involving yourself in all dis," Praise respond as Laycon still dey concerned for Erica.

How pipo dey react to dis 'love triangle'