Rivers state Governor Wike don reopen markets for business

Rivers State Nyesom Wike announce reopening of all markets for di state

Wia dis foto come from, Rivers State Goment House Press

Rivers State goment don announce re-opening of all markets for di state wit effect from Tuesday, August 18, 2020 from 7a.m but dem go close by 6p.m daily.

Governor Nyesom Wike announce dis one for state-wide broadcast say Rumukwurushe (Oil Mill) and Oginiba Slaughter Markets still remain closed.

Di Governor say as markets resume business, dem must operate in strict compliance wit di established protocols on wearing of face masks, washing of hands and maintaining social distancing come add say di Goment lift di ban on markets to increase economic activities for di State.

"Any market wey open to di public and fail to comply strictly wit all dis protocols go close down. We go prosecute di market managers while di shops wey no comply go dey forfeited to di State Government without notice."

Churches fit open

Governor Wike also say Churches fit now hold services wit 50% of dia hall capacity as far as di leadership fit enforce wearing of face masks and washing of hands for di entrance by worshippers.

"Di ban on outdoor sports activities for Port Harcourt Club, Golf Club and di Port Harcourt Polo Club also dey lifted.

"Members of dis clubs must also comply wit di established Covid-19 protocols or risk anoda closure. But, all night clubs, cinemas, bars and in-service restaurants still dey banned until further notice. Di established restrictions on public burials and weddings still dey in force." Di Governor add.

Im come direct all local goment Chairmen to ensure strict compliance wit di protocols for dia local loment areas.

Wia dis foto come from, OTHER

Governor Wike say dem don also increase capacity for di State surveillance, contact tracing, testing and treatment of positive cases in line wit di National Centre for Disease Control (NCDC).