International flight resumption: Nigeria announce 29 August as date for airports to commence foreign travels

Murtala Mohammed Airport Lagos

Wia dis foto come from, Getty Images

Wetin we call dis foto,

Murtala Mohammed Airport Lagos

International flights go resume for Nigeria on 29th August 2020.

Di Minister of Aviation Hadi Sirika wey announce dis one for twitter say Lagos and Abuja go first begin dey fly as as dem do wit domestic flight resumption.

Di minister wey thank Nigerians for dia patience say dem go announce protocols and procedures later.

Dis announcement dey come as Ghana give date for international flight to begin for di kontri as 1st of September dis year.

President Nana Akufo-Addo give di go ahead afta e review di Coronavirus situation onto say active cases don dey reduce for di kontri.

For July 8, Nigeria authorities allow local fight operation to resume for Lagos and Abuja Airport afta three months wey goment bin close am sake of coronavirus pandemic but dem no tok any date for di date for international flight resumption.

How tins go be?

Goment bin don release guidelines as to how tins go waka wen airports re-open and flights resume.

Di operating Procedure dem say na standard go protect all stakeholders and prevent further spread of Covid-19 virus.

Passengers go need to reach airport early, wear face mask and observe social distancing.

Check out di oda guidelines.