Waec chemistry practical: Wetin West African Examination Council tok ontop waec objective answer 2020 and chemistry practical leak

Waec chemistry practical

Wia dis foto come from, AFP

Wetin we call dis foto,

Thousands of final year secondary school students for Nigeria go write West African Certificate Exams SSCE Chemistry practical on Tuesday.

Waec chemistry practical na im thousands of final year secondary school students wey wan study science go write on Tuesday for Nigeria for di on going SSCE but anoda tori dey fly upandan say answers to di exam kwesions leak for internet.

West African Examination Council bin don warn students a day before say di mathematics paper wey dem dey see for social media and oda platforms na fake.

Wia dis foto come from, Getty Images

Waec for Nigeria tell BBC Pidgin say na scammers dey sample all those fake exam papers and dem plan to use an collect money from dia victims.

Ova 1.5 million final year secondary school students for Nigeria start dia West African certificate exams WAEC on Monday wen dem write General Mathematics paper.

WAEC tok tok pesin for Nigeria Demianus Ojijeogu tok say: "Any student wey collect di fake exam papers go surprise wen dem enta exam hall as e go dey different from wetin dey ground".

"I see three of those papers yesterday, all of dem na fake" Na so Mr. Ojijeogu tok.

Wia dis foto come from, Other

Na social distancing rules na im many schools follow as dem dey write di West African Examination Council SSCE.

Waec invigilator chop arrest ontop 'exam expo' money

Meanwhile for Rivers State, di Commissioner for Education, Prof. Kaniye Ebeku, don arrest one teacher ontop accuse say e dey involved in illegal collection of money for examination malpractice as im dey monitor di conduct of di WAEC exams for di State.

Emeka Ricky, di teacher wey dem arrest na teacher for Community Secondary School Ogbogoro for Obio/Akpor local goment.

Dem arrest am during di General Mathematic paper wit over four hundred and forty thousand naira, N440,000 im keep inside im drawer for di school wey authorities claim say im collect from students for exam malpractice.

Some parents from di school bin don complain about di collection of N4000 from each student for di school say na payment for clearance fee.

But Ricky claim say di money na money dem collect for stockings, school badge and for assistance.

Di Education Commissioner come say di State Goment bin don ban any form of collection of charges for schools and so dem go refund di money dem don recover to di students wey pay and di law go take im course as e concern pipo wey do wetin dem no suppose do.

Wetin we call dis foto,

Students for Community Secondary School Ogbogoro, Rivers State

Wetin we call dis foto,

Students wey dey write maths paper on Monday for northern Nigeria

Nigerian students bin resume early August afta about five months wey dem siddon for house sake of coronavirus lockdown order.

West African Examination Council advise candidates to obey di rules and regulations wey dey guide di conduct of di examination by removing hand from all kind of malpractice and obeying all Covid-19 protocols wey di examination centre don put in place.

See di timetable WAEC release for Nigerian candidates:

Wia dis foto come from, Waec

Wia dis foto come from, Waec

Wia dis foto come from, Waec

Wia dis foto come from, Waec

Wia dis foto come from, Waec

Wia dis foto come from, Waec