Wada Maida death: Muhammadu Buhari appointee don die, see five popular things to know about di News Agency of Nigeria former Editor-in-Chief

Wada Maida

Wia dis foto come from, Facebook

Wetin we call dis foto,

Wada Maida

Wada Maida, one former managing director and Editor-in-Chief of News Agency of Nigeria (NAN) don die.

Im die at di age of 70 and tori be say Mallam Maida die on Monday but dem neva give official statement ontop di cause of death.

Before im die di former Editor-in-Chief and later Managing Director of NAN, na one of di pioneer editors of diagency and serve various times as Regional Editor for Kaduna, Political Editor and London Correspondent.

Wia dis foto come from, Daily Trust

Wetin we call dis foto,

Wada Maida na ogbonge shareholder for Nigeria local tori pipo Daily Trust Newspaper

Who be Wada Maida?

Wada Maida from Katsina State, for northern Nigeria, dem appoint am NAN Managing Director for 1994 and im serve for dat office for nine years before im comot for 2003.

Before im die, Maida be member of di Executive Board of di International Press Institute and also shareholder of Media Trust Limited.

For 2017, President Muhammadu Buhari appoint am chairman of NAN Board.

Maida, na former Press Secretary to President Buhari when im be military head of state between 1984 and 1985, na one time board chairman of Peoples Media Limited.

Him become NAN Managing Director for 1994 afta im don serve as Editor-in-Chief beginning from 1985.

Mallam Maida join NAN as pioneer editorial staff for 1978 wia im serve as Political Editor and London Bureau Chief.

For March, President Buhari hail di late Maida on im 70th birthday, im celebrate his achievements for journalism and public service.