Portugal president rescue: 71 old Marcelo Rebelo de Sousa jump enta sea to rescue two women from drowning

Portugal president rescue

Wia dis foto come from, Getty Images

Wetin we call dis foto,

President of Portugal Marcelo Rebelo de Sousa

Portuguese President Marcelo Rebelo de Sousa rush jump enta sea to go rescue two women wey dey drown for one Algarve beach afta dia boat capsize.

Di president wey be 71 years old, just finish tok-tok with journalists for Praia do Alvor beach wen e notice say di women dey struggle inside water.

Na so im come swim go wia dem dey to help dem.

Wia dis foto come from, Radiotelevisao Portuguesa

Wetin we call dis foto,

President Marcelo Rebelo de Sousa (left) as e dey help two women afta dia kayak capsize

Anoda man also swim go wia di women dey to try help turn di boat wey capsize while anoda pesin wey dey on top jet ski also try to help too.

Afta di president rescue di women, e tell tori pipo say di women bin come from anoda beach.

"As strong current dey di sea, di water drag di women out, turn dem around, dem come swallow plenti water and no fit turn dia boat, or climb on top or even swim, na so di strength of di current dey,"

E sama warning say make di women dey careful next time.

Wia dis foto come from, Radiotelevisao Portuguesa

Wetin we call dis foto,

Di president bin currently dey do holiday waka for different regions as part of plan to promote tourism

According to local tori report, President Rebelo de Sousa bin go holiday for Algarve as part of plan to promote tourism for dia.

Portugal economy dey rely heavily on dia tourism industry, wey di coronavirus pandemic don affect.

Di kontri dey popular with British holidaymakers, with almost three million UK visitors a year. More tourists from UK dey travel go di Algarve each summer than from any oda kontri.