Femi Fani-Kayode: Journalist chop insult for press conference 'bankrolling' kwesion e ask Obasanjo former minister - Now Nigerians dey para
Femi Fani Kayode, Nigeria former aviation minister during President Olusegun Obasanjo goment, don come under fire afta video of how e bin dey insult one local journalist wey ask am 'bankrolling' kwesion for Calabar go viral on Tuesday.
Oga Femi bin do press conference (tok-tok plus kwesion and ansa session wit tori pipo alias journalists) afta im do waka alias tour of different states to see work wey each govnor dey do.
According to tori, e don visit six to seven states alreadi since last Thursday and Cross River for southern Nigeria be di next.
But as e dey tok to local tori pipo to brief dem how e feel on top di work wey di Cross River state govnor dey do, na so one jornalist wey de work for Daily Trust Newspaper ask am "wia e dey get moni to do all im tour?".
Na so Femi Fani Kayode begin para and vex pour insult on di journalist.
'Which kain stupid kwesion be dis?', who dey bankroll who? (Femi Fani-Kayode hala for Eyo Charles di Daily Trust reporter)
'Which kain insulting kwesion be dis, who fit give me moni for anytin?
Di Minister wey no fit hide im anger lash out ontop di reporter say make e no judge am by im standard like oda politicians wey dey give am 'brown envelop'.
For inside di viral video of di press conference wey don go viral Fani-Kayode use mouth finish reporter Eyo Charles, wey even tok sorry for wetin im ask.
Daily Trust Newspaper condemn di way oga Femi Fani Kayode take insult dia reporter and di way im security pipo manhandle am.
But oga Femi on top tweeter say di report by Daily Trust no balance and dat e no send any of im security pipo to threaten di reporter.
Di former aviation minister yarn give say e only scold am on top im plan to embarrass am and wen e tok sorry alias apologize, im leave di mata.
Oga Femi kontinu to defend imself even though social media don catch fire on top im reaction.
E say wetin di reporter ask no be kwesion but insult and e no go accept dat kain insult from any man wey woman born.
Now many pipo dey para for di mata
Many no happy wit di action of Femi Fani-Kayode wey imsef don be in 1990 appointed as Chief Press Secretary to Chief Tom Ikimi, di first national chairman of di National Republican Convention (NRC).
Femi Fani-Kayode na 59 year old Nigerian politician, essayist, poet and lawyer. Im don be member of di Peoples Democratic Party (PDP). E later join All Progressive Congress (APC) until June 2014 wen im returned to Peoples Democratic Party.
Fani-Kayode don be Special Assistant (Public Affairs) to President Olusegun Obasanjo from July 2003 until June 2006. He collect anoda appointment as Minister of Culture and Tourism of Nigeria from 22 June to 7 November 2006 and as Minister of Aviation from 7 November 2006 to 29 May 2007.