Electricity tariffs: Nigerians reject new hike of kilowatt per hour energy use by 100%
Nigerians don begin to worry about di new tariff with some saying e go dey hard to pay di increase rate.
“Di tin go worry o. Di tin no go good because already, to even pay di one we dey pay before dey worry us because of di way di economy is. So to come begin increase am now, na anoda problem be dat” One Nigeria tell BBC Pidgin.
Anoda man for Port Harcourt say di goment don too fail for electricity matter for di kontri and if dem must increase tariff, dem must to assure dem say light go dey dey.
“If light go dey dey 24 hours as dem promise us before, I believe say whatever you pay for light, to me, i believe say we will not complain much.” he add say di increment suppose dey gradual.
Dis man say im dey enjoy almost 12 hours of light for im area and if dem increase tariff, im go fit pay. However, e add say if di increase too high, e go go buy generator.
One oda pesin wey follow BBC Pidgin tok for Abuja say goment no get justification for in increment.
“How goment go measure say person get light for 20 hours? How you go know say I dey get light for 10 to 14 hours?” he ask. Di man also tok say some times light no dey come full current for him area and electricity officials go still lie say dem give dem light.
New electricity tariffs in Nigeria 2020 hike for kilowatt unit of energy frustrate pipo from Ikeja to Abuja - See how much you go pay now & why NERC announce sudden hike
Nigerian Electricity Regulatory Commission (NERC) don increase tariff wey pipo for di kontri go dey pay ontop electricity, BBC Pidgin list di new rates.