Hanan Buhari wedding: Bulama say im cartoon no mean any harm for Aisha Buhari daughter marriage

Mustapha Bulama

Wia dis foto come from, Twitter/Mustapha Bulama

Popular cartoonist Mustapha Bulama wey draw First Lady Aisha Buhari dey celebrate her daughter Hanan wedding while Nigerians dey drown inside river don tell BBC say e no mean any harm on di presido pikin marriage.

According to Bulama, e just do di cartoon to show wetin Nigerians dey feel at a time wen di first family dey celebrate dia pikin wedding.

"I no mean any harm on the marriage of Hanan Buhari, na my work I dey do. For di cartoon, na just to show wetin Nigerians dey feel and tok at dis particular time."

Di Daily Trust Newspaper staff also yan say e bin get serious abuse on top social media for di work although e get pipo wey also give am ginger and also pray for am to continue to do more beta work.

Wia dis foto come from, Mustapha Bulama

"Some pipo wey I feel say na pipo wey dey aligned with some politicians bin send insults come my way for social media but I also get many wey praise me, so na so e be."

Bulama say wetin sweet am for belle as Aisha Buhari office react to im cartoon na say pipo in high places dey see im work and e dey pray say e go lead dem to work harder for Nigerians.

"Dis na di first time wey I go get response from dis kain high place regarding my work and e show say dem dey see and listen to us. I just hope say we go inspire dem to make life easier for pipo."

After Bulama cartoon wey show Mrs Aisha Buhari dey show Nigerians pishure of her pikin wedding while dem dey try survive inside river, di first lady spokesman Aliyu Abdullahi yan say di cartoon dey unfair since di wedding dey low key.

Rise in food, fuel and electricity dey make many Nigerians dey complain of hardship at di moment for di kontri.