Bisola Ajayi: Kidnapped Port Harcourt Lawyer don see police rescue

Bisola Ajayi: Kidnapped Port Harcourt Lawyer
Wetin we call dis foto,

Bisola Ajayi afta her rescue

Anti-kidnap unit of Rivers State Police Command don rescue di 25-year-old lawyer Bisola Ajayi wey jaguda pipo kidnap on Sunday 4 October, 2020 from her house for Rumuokwurusi for Obio-Akpor Local Goment Area near Port Harcourt.

Commissioner of Police Rivers State Joseph Mukan tell tori pipo say na on Wednesday 7 October, 2020 night na im di anti-kidnapping unit burst enta one forest for Okomoko, Etche (29 minutes drive and 21.2 km away from Port Harcourt International Airport) to rescue Bisola and Paul Nyulaku, wey di kidnappers also gbab dat same day.

Na Nyulaku motor (white Toyota Venza), di jaguda pipo come use kidnap Bisola.

Meanwhile Bisola Ajayi thank Police authorities and evri bodi wey help free her from di kidnappers hand.

'Dem demand N200 million ransom'- Bisola Ajayi

Bisola say dem kidnap in front of her family come carry her go wia she no know.

Dem talk her say dem don kill her family members, come ask for ransom of N50 million but by di next day, dem increase am to N200 million.

Wia dis foto come from, Bisola Ajayi

She thank God for di timely rescue because as at yesterday, dem bin don decide to kill her as di news don go round so dem bin wan carry her go swamp to kill her.

Di second kidnap victim Paul Nyulaku say na along NTA link Road for Port Harcourt by 6pm on dat Sunday 4 October, 2020 na im some men wey wear military camouflage block am wia im go give document to one of im friend.

"Dem say dem be police officers come forcefully enter my motor, press me down. As I struggle wit dem, dem use di butt of dia gun nack me wey make me come dey bleed.

Dem knack me for head come dey dey beat me until I pretend like say I pass out, dem carry me go wia I no know.

Nyulaku say dem demand N20 million ransom from am, come begin pressure am to tok to dia families to pay di ransom.

Wetin happun for di rescue operation?

CP Mukan say during di operation, one if di kidnappers, 39-year-old Chinedu Chigbu bin dey fatally wounded and dem carry am go hospital wia dem confam say e don die.

Di oda pipo escape enta bush but di police destroy dia camp, recover one AK-47 rifle, with fully loaded magazine and 100 rounds of live ammunition.

Di police ask pipo Etche and Eberi-Omuma to dey alert and report anybody wit gunshot wounds to di nearest police station.

Wia dis foto come from, Bisola Ajayi

Wetin we call dis foto,

Bisola Ajayi