Kagara GSC Students: Dem beat me so tey I wish I die, di forest dey horrific- Student

Kagara Students

Wia dis foto come from, Niger Governor/Twitter

Wetin we call dis foto,

''Dem punish us base on wetin be our parents profession''

Some of di 23 students wey regain dia freedom from dia abductors alongside oda pipo earlier Saturday don dey share wetin dia eyes see for di hands of di gunmen wey kidnap dem for eleven days.

For interview wit BBC Pidgin afta di Niger state govnor address dem for di State House, 20 year-old Abubakar Sidi wey dey SS3 for Kagara GSC say dia abductors dey beat dem according to di kain job wey dia parent dey do.

''We no get food to eat 1pm til e reach night, but dem later give us food. Afta dem give us food, dem come ask if your papa be police come hia, if your papa be soldier come hia, depend on who your papa be , na so your beating go be'' E narrate.

Anoda student Suleiman Lawal wey also dey SS3 say ''we suffer well well. I never see dis kain situation for my life.

''I no think I go like go back to dat school again'' E add.

Di girls wey dey among no fit tok as dem no fit hold dia emotions.

Some parents wey speak wit BBC Pidgin say dem no dey sure whether dem go fit allow dia pikins go back to di school or any boarding school at all.

Mrs Elizabeth Jonathan, mother of another student Collins Vincent say she no sleep for all di days wey her pikin dey kiddnapper den.

''I never tok to am yet, but I don see am and we don wave to each other. I thank God say e don come back alive.

''My child no dey go back to dat school again and e no go attend boarding school again'' She tok.

Wia dis foto come from, Niger Governor/Twitter

We dey review closing down of all boarding schools for di state- Govnor Sani Bello

Niger state govnor, Abubakar Sani Bello confam say na all di 38 pipo wey di gunmen kidnap for Kagara eleven days agos im receive for inside di State House, Minna after dem don receive medical attention.

E say one of di 23 students dey hospital dey receive medical treatment sake of excessive exhaustion.

Di govnor tok dis wen e dey address di released students, staff and dia parents and relatives on Saturday.

Govnor Bello further tok say ''As we dey move forward, we go tourchlight wetin di cause be and we go find lasting solution to am''

E say dem don dey review closing down of all boarding schools for di state.

Wia dis foto come from, Niger State Governmnet

Wetin we call dis foto,

Di students and other victims for government house dey wait medical personnel

Niger goment confam release of kidnapped students, staff

Niger State government don confam report say di Abducted Students, Staff and Relatives of Government Science Collage Kagara don regain dia freedom.

For inside tweet, di Governor of Niger State, Abubakar Bello say im don welcome di students and others for di government house on Saturday.

Wia dis foto come from, Twitter/ Governor Niger

Jaguda pipo bin kidnap students of di Government Science College Kagara, for Rafi Local Government Area of Niger State one week ago

Dem kidnap about 27 students and 12 other persons from di school.

"Di Kagara schoolboys have been released. dem dey on dia way to town now," one source also tell local tori pipo.

"Dem don release all di boys and and dia family members."

Di principal of di GSC Kagara also confam di release of di abducted Students to former Nigerian Senator Shehu Sani, as im tok for twitter.

Dis release of di Kagara students dey come just one day afta jaguda pipo kidnap over 300 schoolgirls from Government Girls Secondary School, Jangebe in Zamfara state.