Asari Dokubo Biafra: 'Biafra de facto Customary Government' Niger Delta ex-militant leader form & Nigeria reply

"Asari Dokubo Biafra"

Wia dis foto come from, Getty Images

Wetin we call dis foto,

Asari Dokubo

Mujahid Asari-Dokubo, a former Niger Delta militant leader don form "Biafra de facto Customary Government", shortened as BCG to replace IPOB separatist group wey Nigeria Federal Government ban and label terrorist organization.

Asari-Dokubo make dis announcement inside one video for im Facebook page calling on some of im brothers to join di struggle to 'freedom'.

Di former Niger Delta militant leader also promise security of lives and pipo under dis 'new goment' and also promise science and technology breakthrough.

Inside di over 20 minutes video, Asari-Dokubo tok about di plans of di 'new goment'.

Im also release a statement through one Uche Mefor, wey identify himself as di Head of Information and Communication of di 'new goment'.

Mujahid Asari-Dokubo tok for inside statement, say na di injustice and marginalisation on di Igbos for various zones of di kontri be di reason for forming di 'new government'.

Some part of di statement read: "We go set up provincial structures of goment starting wit provincial assemblies and provincial governance and administrators. Make nobody mistake say Biafra go worse pass Nigeria.

"Nobody fit stop us. Nobody fit block us as dem do for di first war. We no go fight any war wit anybody, we dey walk to freedom. We no go shoot any gun wit dem (referring to di Nigeria Armed Forces), dem go prepare dia weapons, but dem no go get anybody to kill wit dia weapons," Asari tok for statement.

For Nigeria, di law book alias constitution set clear rules to create a goment or state and dis goment wey Asari-Dokubo form so no follow di rule of Nigeria constitution.

Wia dis foto come from, Getty Images

Biafra agitation inside Nigeria

Since afta di 1967 Nigerian civil war popularly known as di "Biafra War" many groups don dey agitate for di Igbo speaking part of Southern Nigeria to go dia separate way.

Diis groups include di Indigenous People of Biafra [IPOB] and di Movement for Actualization of Sovereign State of Biafra [MASSOB]

Di immediate cause of di recent agitation for Biafra inside Nigeria start from di 19 October, 2015.

Dat na wen dem arrest of Nnamdi Nwannekaenyi Kanu, leader of Indigenous People of Biafra, [IPOB], by di kontri secret police Department of State Services [DSS].

Nnamdi Kanu na di director of Radio Biafra, one unlicensed station wey dey crusade for violent struggle to achieve independence for Biafra inside Nigeria's south east.

Charges against Kanu include sedition, ethnic incitement and treasonable felony.

Some of dis offences carry heavy penalties, from long jail terms to death sentence.

Those wey dey agitate bin dey primarily demand him freedom, but also call for di restoration of Biafra as an independent kontri.

As at today Biafra no dey exist as a unit or form of goment inside Nigeria and di separatists no dey clear about how dem see di territory of di "new Biafra".

Some claim say e go include all areas wey di Igbo pipo, including parts of di oil-rich Niger Delta ,wey Asari-Dokubo from, to di south and Benue state to di north.

But di oda pipo of dis regions dem don oppose di plan to include dem inside any new Biafra, according to International Crisis Group Nigeria analyst Nnamdi Obasi.

Oda separatists say a restored Biafra go dey limited to five core Igbo states - Abia, Anambra, Ebonyi, Enugu and Imo - also known as Nigeria "South East Zone".

How Nigeria government react to 'Biafra de facto Customary Government' formation

Nigeria Minister of Information and Culture, Lai Mohammed respond to di claims of di formation of 'Biafra de facto Customary Government' by Asari-Dokubo as theatre of di absurd by a joker wey dey seek attention.

Oga Lai Mohammed say di Nigerian goment no go dey distracted by absurdity or give attention to Asari Dokubo as im be 'Entertainer'.

Di Information Minister say dem go just take di report as one of those entertainment scenes.

He say federal goment get a lot of things for dia hand than to attend to such issues.

Wia dis foto come from, Screenshot

Wetin we call dis foto,

Nigeria Minister of Information and Culture, Lai Mohammed

Under Nigeria democratic rule, a bill for an Act of di National Assembly for di purpose of creating a new State na im pipo wey want new goment go submit.

Wen di parliament pass di bill, di Nigerian president go sign am into law - dat be di legal wey to create a new goment inside present day Nigeria.

Anoda way to go about dis mata na "referendum" wey be vote wia everyone of voting age inside di kontri or area wey need am go give dia opinion about or decide an important political, social or national kweshion like di "Biafria" struggle.

But Nigeria 1999 amended constitution no get express provision on referendum even despite series of amendments.

So except and until di constitution see further amendment to make provision for referendum, di 1999 constitution of Nigeria wey be di supreme law of di land of Nigeria no get any window or room for referendum.

Who be Asari Dokubo?

Born Melford Dokubo Goodhead Jr. on June 1, 1964 (age 56), Mujahid Asari-Dokubo bin lead di Niger Delta Peoples Volunteer Force [NDPVF] - wey be militant group wey bin operate for di oil rich southern Nigeria - until 2009.

Na in 2009 di then President Yar Adua [Federal Government] forgive dem by announcing Amnesty Programme for all Niger Delta militants.

Before di Amnesty Programme wey see Asari-Dokubo and im followers give up im militancy struggle and submitting dia arms to di goment, im militant group bin dey blow up crude oil pipelines.

NDPVF militant group bin dey also kidnap expatriates for international oil companies to drive home di message of dia struggle.

Mujahid Asari-Dokubo bin chop arrest under di civilian administration of President Olusegun Obasanjo for 2007 on top accuse of treason.

Dat time, after Asari-Dokubo no gree to accept di legitimacy of di Olusegun Obasanjo goment and due to im public support for self-determination of im native Ijaw pipo and independence for di Niger Delta, Asari chop arrest.

On 14 June 2007, Federal Government of Nigeria release Asari on bail as part of new President Umaru Yar'Adua's pledge to try and bring peace to di Niger Delta region

Dokubo arrest bin set off threats of violence by im followers against foreign oil interests for di delta region- wey generate di majority of Nigeria's oil- during dat time.

For 2013, Dokubo Asari become a citizen of Benin Republic and move im wealth and assets out of di Niger Delta, Nigeria and relocate to Cotonou, Benin Republic wia im build a university.

Asari-Dokubo na native of Abonnema inside Rivers State for southern Nigeria, him and Nnamdi Kanu, di director of Radio Biafra, no get one mouth ontop dis Biafra struggle mata.