Guy Brice Parfait: Congo-Brazzaville presidential election candidate die on election day
One of di leading opposition candidate for Congo-Brazzaville presidential election wey happun yesterday don die.
Oga Guy-Brice Parfait Kolelas wey bin dey battle wit coronavirus for hospital as election dey go on die for di age of 61.
From di capital, Brazzaville dem evacuate di opposition leader go France on Sunday afternoon afta im bin test positive to coronavirus last Friday, di last day of di electoral campaign.
According to observers, polls happun smoothly on Sunday but wit low participation.
A day before di election, inside one video for social media, Guy Brice Parfait Kolelas briefly remove im oxygen mask to tell im supporters say e dey "fight death". E tell dem to vote for di election.
Mr Kolelas, wey dey diabetic, na one of six candidates wey dey run against President Denis Sassou Nguesso.
Former Minister of Fishing and civil servants, Guy-Brice Parfait Kolelas na di son of former Prime Minister, Bernard Kolelas.
Di electoral law for Congo no dey cancel election if one candidate die.
Wetin we know about di mata
According to di Associated Press news agency, Mr Kolelas miss im final campaign event on Friday afta e bin tok earlier on say e dey fear say e get malaria.
Dem admit am to one private hospital for di capital, Brazzaville, and na dia dem later confam am say e get Covid-19.
Speaking in French from im hospital bed, Mr Kolelas tok say: "My dear compatriots, I dey trouble. I dey fight death. However, I ask you to stand up and vote for change. Make e no be like I fight for nothing."
Mr Kolelas come second for di last election for 2016, e get only 15% of di vote compared with Mr Sassou Nguesso 60%.
Sabi pipo see Mr Sassou Nguesso, 77, as authoritarian ruler wey dey expected to win again.
Watchdog group NetBlocks report say internet bin don dey shut down ahead of Sunday voting.
Di largest opposition party, di Pan-African Union for Social Democracy (UPADS), boycot di election, ontop fear say di election fit divide di nation.
Congo-Brazzaville Catholic Church Episcopal conference bin tok say dem get "serious reservations" about di election transparency.
Mr Sassou Nguesso don dey power since 1979, except for one five-year period afta e lose elections for 1992.
Congo-Brazzavile don officially record more dan 9,000 cases of Covid and 130 deaths.