Benue news: Why Governor Samuel Ortom tok say 'insecurity fit pause 2023 election'

President Buhari meet Governor Ortom

Wia dis foto come from, Nigeria Prsidency

Benue State Govnor, Samuel Ortom don tok say if di insecurity situation for di kontri continue to dey bad as e bad, di 2023 election no go hold.

Govnor Ortom tok dis one on Tuesday wen im bin go see Nigerian President Muhammadu Buhari for di Presidential Villa for Abuja.

E thank di presido as for di way Buhari bin condemn di attack on Ortom farm, however, im comot di meeting with Buhari tell tori pipo say di kontri dey sit on top gunpowder and neva make any meaningful progress on top di mata of security..

Na last Saturday, Ortom convoy bin dey attacked by gunmen wey dem suspect say na herders for Tyo Mu along Makurdi/Gboko road for Makurdi Local Goment Area.

E tok say di reason why election no go fit hold na because Nigerians no go fit to dey think of election wen di kontri no dey safe.

"I sabi say di security palava for we kontri today no be about di president or we as state govnors. Na about every citizen for dis kontri, so we gats work togeda so we go fit overcome dem."

E tok say time done reach make di kontri shift politics, and ethnicity go one corner, collabo to make sure say di kontri dey safe.